كيم چەن ىن وڭتۇستىك كورەيا باسشىسىنا سىيعا تارتقان كەسپە ەكى ەل اراسىن جىلىتقان تاعامعا اينالدى

استانا. قازاقپارات -  نەنمەن دەپ اتالاتىن سولتۇستىك كورەيانىڭ ءداستۇرلى تاعامى ەكى كورەيا مەملەكەتى اراسىندا وتكەن ءسامميتتىڭ رامىزىنە اينالدى.

 27 - ساۋىردە وتكەن باسقوسۋعا سولتۇستىك كورەيا باسشىسى كيم چەن ىن وسى كەسپەنى سىيعا اكەلىپ، ونى كەشكى اسقا دايىنداعان بولاتىن. وڭتۇستىك كورەيا پرەزيدەنتى بۇل تاعامدى ماقتاعاننان كەيىن، سولتۇستىك كورشىسىنىڭ تاعامدارىنا ماماندانعان ءدامحانالار ادامعا تولىپ كەتتى. ءتىپتى كەيبىرەۋىنە كىرۋ ءۇشىن ۇزاق كەزەك كۇتۋ قاجەت بولعان.

جالپى، اۋا رايىنا بايلانىستى ەكى ەلدىڭ تاعامدارى ءبىر- بىرىنەن قاتتى ەرەكشەلەنەدى. سولتۇستىكتە سۋىق بولعاندىقتان كوكونىس ءوسىرۋ قيىن. سول سەبەپتەن تاعامدارىنا كوكونىس پەن دامدەۋىشتەردى كوپ قوسپايدى. ال الەۋمەتتىك جەلىلەردە وڭتۇستىك كورەيا تۇرعىندارى كەلىسسوزدەردە جەتكەن كەلىسىمدەردەن گورى نەنمەن كەسپەسىن كوبىرەك تالقىلاعان. «سۋىق تۇردە بەرىلسە دە، ەكى ەل اراسىن جىلىتقان تاعام بولدى» دەيدى.

www.24.kz