تۇركىستاندا قاسىم قايسەنوۆكە ارنالعان كورمە اشىلدى

شىمكەنت. قازاقپارات - تۇركىستانداعى «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ كىتاپحاناسىندا بەلگىلى جازۋشى، قازاقستاننىڭ حالىق باتىرى قاسىم قايسەنوۆتىڭ 100 جىلدىعىنا ارنالعان «قازاقتىڭ قايسار ۇلى - قاسىم باتىر» اتتى كىتاپ كورمەسى اشىلدى، دەپ حابارلايدى قازاقپارات ءتىلشىسى.

شاراعا تۇركىستان قالاسىنداعى كىتاپحانا وكىلدەرى، ستۋدەنتتەر مەن وقۋشىلار جانە مۋزەي قىزمەتكەرلەرى قاتىستى.

تۇركىستاندا قاسىم قايسەنوۆكە ارنالعان كورمە اشىلدىاتالعان كىتاپ كورمەسىندە كەلۋشىلەرگە «ازىرەت سۇلتان» قورىق-مۋزەيى قورىنان قاسىم قايسەنوۆتىڭ ەرلىگى تۋرالى ماتەريالدار، ونىڭ شىعارمالارى، تۋىستارى مەن دوستارىنىڭ ەستەلىكتەرى جانە مەرزىمدى باسىلىم بەتتەرىندە جاريالانعان ماقالالارى ۇسىنىلدى. سونىمەن قاتار، باتىر جايىندا دايىندالعان قىسقاشا بەينەروليك قويىلدى. جاستارعا ونىڭ ءومىر دەرەگى تۋرالى اقپاراتتار تانىستىرىلدى. «قازاقتىڭ قايسار ۇلى - قاسىم باتىر» اتتى كىتاپ كورمەسى ءبىر ايعا جالعاسادى دەپ جوسپارلانعان.

ايتا كەتەيىك، قاسىم قايسەنوۆ ۇلى وتان سوعىسىنا قاتىسىپ، پارتيزاندار وتريادىن باسقارعان. ۋكراينا، بەلارۋسيا، مولداۆيا، چەحوسلاۆاكيا جانە تاعى دا باسقا جەرلەردى ازات ەتۋگە قاتىسقان. اتى اڭىزعا اينالعان پارتيزان، جازۋشى قاسىم قايسەنوۆ قازاقستاندا عانا ەمەس، بۇرىنعى كەڭەستەر وداعىنىڭ تۇكپىر - تۇكپىرىنە كەڭىنەن تانىلعان. اسكەري تاقىرىپقا ارنالعان كىتاپتارعا دەگەن قىزىعۋشىلىعى ايرىقشا ونىڭ شىعارماشىلىعى مەمۋارلار، دەرەكتى جانە كوركەم پروزا مەن پۋبليتسيستيكا سىندى ءتۇرلى جانرلاردى ۇشتاستىرادى. ق ر پرەزيدەنتىنىڭ 1995 ج. 24- ساۋىردەگى جارلىعىمەن جازۋشى قاسىم قايسەنوۆكە «حالىق كاھارمانى» ەرەكشە بەلگىسى تاعايىندالىپ، «التىن جۇلدىز» بەن «وتان» وردەنى بەرىلگەن.