وڭتۇستىك كاسىپكەرلەرى تاۋارلارىن تومەنگى باعادا ۇسىندى
مەملەكەتتىك باعدارلاما اياسىندا ءوز كاسىبىن دوڭگەلەتكەن 60 كاسىپكەر كەلۋشىلەرگە وزدەرىنىڭ تاۋارلارىن تومەنگى باعادا ۇسىندى، دەپ حابارلايدى قازاقپارات ءتىلشىسى.
العاش رەت جۇمىسپەن قامتۋ باعدارلاماسىنىڭ قاتىسۋشىلارىمەن وتكەن جارمەڭكەنى وبلىس اكىمدىگى مەن «دامۋ» قورى، «وڭتۇستىك» ا ي و جانە «ىرىس» ميكروقارجى ۇيىمدارى ۇيىمداستىردى. «ەڭبەك» جاپپاي كاسىپكەرلىك باعدارلاماسى قاتىسۋشىلارىنىڭ جارمەڭكەسىندە ەت جانە ءسۇت ونىمدەرى، جەمىس-جيدەك، كوكونىستەر مەن قولونەر شەبەرلەرىنىڭ بۇيىمدارى ساتىلدى.
مەرەكەلىك جارمەڭكە بولعاندىقتان مۇندا ويىن-ساۋىق جانە كونتسەرتتىك شوۋ-باعدارلامالار قويىلىپ، سىيلىقتار ۇتىسى ۇيىمداستىرىلدى. سونداي- اق، ساتىپ الۋشىلارعا لوتەرەيا بيلەتتەرى تاراتىلىپ، جەڭىمپازدارعا جارمەڭكە الاڭىندا عانا جارامدى اقشالاي كۋپوندار تابىستالدى.
ايتا كەتەيىك، «ەڭبەك» جاپپاي كاسىپكەرلىك باعدارلاماسىنىڭ ارقاسىندا «دامۋ» قورى ارقىلى وڭتۇستىك قازاقستان وبلىسى بويىنشا 150 باستاۋىش جانە اعىمداعى كاسىپكەرلەر ءوز ءىسىن اشىپ، كەڭەيتۋ مۇمكىندىگىنە يە بولدى. جالپى قارجىلاندىرۋ كولەمى 1,4 ميلليارد تەڭگەنى قۇرادى. ال، «ىرىس» ميكروقارجى ۇيىمى 2017-جىلى اتالعان باعدارلاما اياسىندا «دامۋ» كاسىپكەرلىكتى قولداۋ قورى مەن «اگرارلىق نەسيە كورپوراتسياسى» ا ق ارقىلى جالپى 900 ميلليون تەڭگە قاراجات تارتىپ، ناتيجەسىندە 180 جاڭا جۇمىس ورنى قۇرىلعان 191 جوبانى قارجىلاندىردى.
ايتا كەتۋ كەرەك، اگرارلىق نەسيە كورپوراتسياسىنان تارتىلعان قاراجات اۋىل تۇرعىندارىنا تاراتىلسا، «دامۋ» قورىنان بولىنگەن قاراجات ارقىلى كەنتاۋ، تۇركىستان جانە شىمكەنت قالالارىنىڭ تۇرعىندارى نەسيەلەندىرىلدى.
