نۇرسۇلتان نازاربايەۆ ءوز دەنساۋلىعىنا قالاي قارايتىنىن ايتىپ بەردى

استانا. قازاقپارات - مەملەكەت باسشىسى نۇرسۇلتان نازاربايەۆ مەديتسينانىڭ سوڭعى جاڭالىقتارىن ءجىتى باقىلاۋعا كەڭەس بەردى، دەپ حابارلايدى قازاقپارات ءتىلشىسى.

«مەديتسينادا كۇن سايىن ءبىر جاڭالىقتار شىعىپ جاتادى. ايتپەسە، جارنامانى تىڭداپ كورسەڭ، نە جەيتىنىڭدى بىلمەي قالاسىڭ. بۇگىن كوفەنى ىشۋگە بولادى دەيدى. ەرتەسىندە زياندى دەپ جازىپ جاتادى. كۇنى كەشە مەن قىزىل ەتكە قاتىستى ءبىر ماتەريال وقىدىم. ونى دا دەنساۋلىققا پايداسى جوق دەپ كەلدى. ال مالدىڭ مايى ەڭ پايدالى دەيدى. وسىنى ادامنىڭ ءوزى عانا انىقتاي الادى. سەنىڭ دەنەڭ، اعزاڭ ونى قابىلداي ما، جوق پا، ءوز بەلگى بەرەدى»، - دەدى ن. نازاربايەۆ قازاقستان حالقى اسسامبلەياسىنىڭ XXVІ سەسسياسىندا.

وسى ورايدا پرەزيدەنت دارىگەر مامانداردى دايارلاۋ جۇمىسىنا باسا نازار اۋدارۋ قاجەتتىگىنە توقتالدى. وسى جۇمىسقا ادام ءوز قالاۋىمەن كەلۋى ءتيىس.

 ايتا كەتەيىك، قازاقستان حالقى اسسامبلەياسىنىڭ XXVІ سەسسياسىندا ق ر ۇلتتىق بانك ءتوراعاسى دانيار اقىشيەۆ پرەزيدەنتكە «7-20-25» باعدارلاماسى تۋرالى ايتىپ بەردى. مەملەكەت باسشىسى اتالعان باستاما اياسىندا ارزان يپوتەكانى الدىمەن جاس وتباسىلارعا بەرۋدى ۇسىندى. سونداي- اق، پرەزيدەنت شىمكەنتتەگى تويلاردى سىنعا الدى.

اۆتور: ارمان اسقاروۆ