پرەزيدەنت شىمكەنتتەگى تويلاردى سىنعا الدى

استانا. قازاقپارات - مەملەكەت باسشىسى نۇرسۇلتان نازاربايەۆ ۇلان- اسىر تويلاردىڭ اقشاسىن تەككە شاشپاي، ءتيىمدى شارالارعا جۇمساۋعا ۇندەدى، دەپ حابارلايدى قازاقپارات ءتىلشىسى.

«شىمكەنت قانشاما تويحانانى سالىپ تاستادى. قازىر دە سالىنىپ جاتىر. دالادا 200-500 ادامعا داستارحان جايىپ تاستايدى دا، تاباقتى اتپەن اكەلىپ تاراتادى. ودان دا بۇل اقشانى جاستارعا بەرەيىك، باسپانا السىن. ولار ءۇشىن ەڭ ۇلكەن سىيلىق بولادى»، - دەدى ن. نازاربايەۆ قازاقستان حالقى اسسامبلەياسىنىڭ XXⅥ سەسسياسىندا.

وتىرىس بارىسىندا مەملەكەت باسشىسى «7-20-25» باعدارلاماسىن حالىققا تۇسىنىكتى تىلدە جەتكىزۋدى تاپسىردى. سەبەبى شەنەۋنىكتەر تىم كۇردەلى تىلمەن ءتۇسىندىرىپ جاتادى.

«باعدارلامانىڭ ءتيىمدى تۇستارىن تۇسىنىكتى تىلدە جەتكىزۋ كەرەك. ايتپەسە، ادامدار تۇسىنبەيدى. ادام ءۇش بولمەلى ءۇيدىڭ تەك 20 پروتسەنتىن عانا تولەيدى. وسىلاي ءتۇسىندىرۋ كەرەك. ەڭ باستىسى، اقشانى بەرىڭدەر. باسپانا سالىنسىن. بولدى. ءالى ەسىمدە، بەس الەۋمەتتىك باستامانى جەكە- جەكە تالقىلاعاندا سان الۋان سۇراقتار بولدى. اقشا جوق دەدى. قالاي جوق؟ تاپتىق قوي. مىنە، ەندى «7-20-25» باعدارلاماسىن باستايىن دەپ وتىرمىز»، - دەپ اتاپ كورسەتتى ن. نازاربايەۆ.

ق ر ۇلتتىق بانكى ءتوراعاسى دانيار اقىشيەۆتىڭ ايتۋىنشا، «7-20-25» مەملەكەتتىك باعدارلاماسى مامىر ايىندا قابىلدانادى. ال ەكىنشى جارتىجىلدىقتا باعدارلاما تالاپتارىنا ساي كەلەتىن ازاماتتار ارزان يپوتەكانى الا الادى.

ايتا كەتەيىك، قازاقستان حالقى اسسامبلەياسىنىڭ XXⅥ سەسسياسىندا ق ر ۇلتتىق بانك ءتوراعاسىدانيار اقىشيەۆ پرەزيدەنتكە «7-20-25» باعدارلاماسى تۋرالى ايتىپ بەردى. مەملەكەت باسشىسى اتالعان باستاما اياسىندا ارزان يپوتەكانى الدىمەن جاس وتباسىلارعا بەرۋدى ۇسىندى.

اۆتور: ارمان اسقاروۆ