پرەزيدەنت بەس الەۋمەتتىك باستامادا باسپانا نەلىكتەن ءبىرىنشى قويىلعانىن ايتتى
«بىردەن اتاپ وتەيىن بەس الەۋمەتتىك باستاما - بۇل قاراپايىم حالىققا قاتىستى بەس ماڭىزدى الەۋمەتتىك ماسەلەنى شەشۋ جولى. اسسامبلەيانىڭ مۇشەلەرى وزگە دە قازاقستاندىقتار سەكىلدى وسى باعدارلامانىڭ مازمۇنىن بىلەدى. سوندىقتان، تەك قاعيداتتى تۇستارىن اتاپ وتەيىن»، - دەگەن پرەزيدەنت بەس الەۋمەتتىك باستامانىڭ العاشقىسى تۋرالى كەڭىرەك توقتالدى.
پرەزيدەنتتىڭ ايتۋىنشا، ءبىرىنشى باستاما - ءۇيى جوقتارعا باسپانا الۋدىڭ جاڭا مۇمكىندىكتەرىن اشادى، تۇرعىن ءۇي يپوتەكاسىنىڭ قولجەتىمدىلىگى ماسەلەسىن شەشەدى.
«ءال- اۋقاتتى ءومىر ءسۇرۋ باعىتىندا باسپانانىڭ قانشالىقتى ماڭىزدى ەكەنىن بىلەمىز. وسى باعدارلامانى سوندىقتان دا ءبىرىنشى ورىنعا قويدىم. جاڭا شارتتار بويىنشا يپوتەكا الۋ مۇمكىندىگىنە ءاربىر جۇمىس ىستەپ جۇرگەن قازاقستاندىقتىڭ يە بولۋى اسا ماڭىزدى. ءبىز ءبارىن ەسەپتەدىك. ەلۋ- الپىس شارشى مەترلىك ەكى بولمەلى پاتەردى الىپ، يپوتەكا ارقىلى تولەۋ ءۇشىن ەكى ادام جۇمىس ىستەسە وتباسىنىڭ بيۋدجەتىنە از جۇكتەمە تۇسەدى. ياعني، ولار 25 جىلعا سوزىلعان يپوتەكانى تولەي الادى. بۇعان قوسا، العاشقى جارنا بۇرىنعىداي 50 پايىز ەمەس، 20 پايىز بولادى. بۇل - ءبىزدىڭ ميلليونداعان تۇرعىندارىمىز ءۇشىن جاسالىپ وتىر. اسىرەسە جاستار وتباسى جۇمىس اتقارىپ، وسى باعدارلاما ارقىلى باسپانا الا الادى»، - دەدى مەملەكەت باسشىسى.
ايتا كەتسەك، ەلورداداعى بەيبىتشىلىك جانە كەلىسىم سارايىندا ەلباسى نۇرسۇلتان نازاربايەۆتىڭ توراعالىعىمەن قازاقستان حالقى اسسامبلەياسىنىڭ XXⅥسەسسياسى ءوتىپ جاتىر.
«بەس الەۋمەتتىك باستاما - قوعامنىڭ الەۋمەتتىك بىرلىگىنىڭ تۇعىرى» دەگەن كۇن تارتىبىمەن باستالعان سەسسيا جۇمىسىنا 1500-دەن استام ادام قاتىسۋدا. ولاردىڭ قاتارىندا ەلدىڭ بارلىق وڭىرلەرىنەن كەلگەن اسسامبلەيانىڭ ارداگەرلەرى، رەسپۋبليكالىق جانە وڭىرلىك ەتنومادەني بىرلەستىكتەردىڭ ءتوراعالارى، پارلامەنت دەپۋتاتتارى، ورتالىق اتقارۋشى ورگانداردىڭ، ساياسي پارتيالاردىڭ، ءدىني بىرلەستىكتەردىڭ، ۇكىمەتتىك ەمەس ۇيىمداردىڭ باسشىلارى، جوو رەكتورلارى، شەت مەملەكەتتەردىڭ ديپلوماتيالىق ميسسيالارىنىڭ، عىلىمي، شىعارماشىل زيالى قاۋىمنىڭ جانە ب ا ق- تىڭ وكىلدەرى بار.
سەسسيا سوڭىندا سالتاناتتى كونسەرت وتەدى.
