پرەزيدەنت بەس الەۋمەتتىك باعدارلاماعا قانشا قاراجات جۇمسالاتىنىن اتادى
بۇل تۋرالى ەلورداداعى بەيبىتشىلىك جانە كەلىسىم سارايىندا ءوتىپ جاتقان قازاقستان حالقى اسسامبلەياسىنىڭ XXⅥسەسسياسىندا پرەزيدەنت نۇرسۇلتان نازاربايەۆ ءمالىم ەتتى، دەپ حابارلايدى قازاقپارات ءتىلشىسى.
«بىردەن ايتارىم - بۇل مەملەكەت ءۇشىن ارزانعا ءتۇسىپ وتىرعان جوق. بەس الەۋمەتتىك باعدارلامانى جۇزەگە اسىرۋ ءۇشىن 2 تريلليون 600 ميلليارد تەڭگە باعىتتاۋ جوسپارلانىپ وتىر. بۇل - اسا اۋقىمدى قاراجات. بۇل - ءبىزدىڭ ازاماتتارعا جانە بولاشاققا سالىنعان سالىم. ءبىز ازاماتتاردىڭ ءال- اۋقاتىن ارتتىرۋ ءۇشىن وسىنشاما قاراجاتتى جيناي الدىق. ءبىزدىڭ حالىق وسىنى لايىقتى باعالار دەگەن ۇمىتتەمىن. وسىنداي ساياساتتى ارى قاراي جالعاستىرا بەرەمىز»، - دەدى مەملەكەت باسشىسى.
نۇرسۇلتان نازاربايەۆ بەس الەۋمەتتىك باستاما - ازاماتتاردىڭ ءال- اۋقاتىن كوتەرۋگە باعىتتالعان بەس اۋقىمدى الەۋمەتتىك جوبا ەكەنىن ايتتى.
«ەڭ باستىسى - وسىلاردىڭ بارلىعى دا ءاربىر قازاقستاندىقتىڭ ءال- اۋقاتىن ارتتىرۋ ءۇشىن بۇكىل قوعامعا باعىتتالعان. بۇل جالپى ۇلتتىق باعدارلامالار. مەن وسى جۇمىسقا ماقساتتاردى جۇزەگە اسىرۋ ءۇشىن «نۇر وتان» پارتياسىمەن بىرگە اسسامبلەيانىڭ ارالاسقانىن قالار ەدىم»، - دەدى نۇرسۇلتان نازاربايەۆ.
ايتا كەتسەك، ەلورداداعى بەيبىتشىلىك جانە كەلىسىم سارايىندا ەلباسى نۇرسۇلتان نازاربايەۆتىڭ توراعالىعىمەن قازاقستان حالقى اسسامبلەياسىنىڭ XXⅥسەسسياسى ءوتىپ جاتىر.
«بەس الەۋمەتتىك باستاما - قوعامنىڭ الەۋمەتتىك بىرلىگىنىڭ تۇعىرى» دەگەن كۇن تارتىبىمەن باستالعان سەسسيا جۇمىسىنا 1500-دەن استام ادام قاتىسۋدا. ولاردىڭ قاتارىندا ەلدىڭ بارلىق وڭىرلەرىنەن كەلگەن اسسامبلەيانىڭ ارداگەرلەرى، رەسپۋبليكالىق جانە وڭىرلىك ەتنومادەني بىرلەستىكتەردىڭ ءتوراعالارى، پارلامەنت دەپۋتاتتارى، ورتالىق اتقارۋشى ورگانداردىڭ، ساياسي پارتيالاردىڭ، ءدىني بىرلەستىكتەردىڭ، ۇكىمەتتىك ەمەس ۇيىمداردىڭ باسشىلارى، جوو رەكتورلارى، شەت مەملەكەتتەردىڭ ديپلوماتيالىق ميسسيالارىنىڭ، عىلىمي، شىعارماشىل زيالى قاۋىمنىڭ جانە باق- تىڭ وكىلدەرى بار.
سەسسيا سوڭىندا سالتاناتتى كونسەرت وتەدى.
