بىشكەكتە «ورالمان» فيلمى قوس جۇلدەنى قاتار الدى

 استانا. قازاقپارات - «ورالمان» كوركەم ءفيلمى بىشكەكتە وتكەن «اق ءىلبىرىس» ۇلتتىق كينوجۇلدەسىنىڭ قوس ماراپاتىنا قول جەتكىزدى.

 فيلم «ورتالىق ازيانىڭ ۇزدىك فيلمى» جۇلدەسىمەن، ال كارتينادا باستى ءرولدى سومداعان اكتەر دۋلىعا اقمولدا «ورتالىق ازيانىڭ ۇزدىك اكتەرى» جۇلدەسىمەن ماراپاتتالدى.

مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاقفيلم» كينوستۋدياسى تۇسىرگەن اتالمىش فيلم تۋعان جەرىنەن كەتۋگە ءماجبۇر بولعان، الايدا ونداعان جىلدار وتكەن سوڭ اۋعانستاننان ەلىنە قايتا ورالعان قانداستارىمىز جايلى باياندايدى. رەجيسسەرى - ءسابيت قۇرمانبەكوۆ.

 ەستەرىڭىزگە سالا كەتسەك، «ورالمان» كوركەم فيلمى يراننىڭ استاناسى تەگەراندا وتكەن 35-حالىقارالىق فادجر كينوفەستيۆالى مەن XIII حالىقارالىق «ەۋرازيا» كينوفەستيۆالىنىڭ باس جۇلدەسىن جەڭىپ العان بولاتىن. فيلمدە باستى ءرولدى سومداعان اكتەر دۋلىعا اقمولدا قىركۇيەك ايىندا تاتارستاندا وتكەن XIII حالىقارالىق مۇسىلماندار كينوسى فەستيۆالىندە «ۇزدىك ەر ادام ءرولى» جۇلدەسىمەن ماراپاتتالدى. سونداي- اق، كارتينا يتاليادا وتكەن ⅹⅹحالىقارالىق «Religion Today» كينوفەستيۆالىندە «ۇزدىك فيلم» نوميناتسياسىندا جەڭىسكە جەتىپ، تاۋەلسىز SIGNIS قازىلار القاسىنىڭ ارنايى جۇلدەسىن يەمدەندى. ودان بولەك، گەرمانيادا وتكەن 66- حالىقارالىق مانگەيم- حايدەلبەرگ كينوفەستيۆالىندە «ورالمان» فيلمى ۇزدىك جەتىستىكتەرى ءۇشىن ارنايى جۇلدەمەن ماراپاتتالدى. اقپان ايىندا اتالعان كينوتۋىندى نەپالدا وتكەن 22- حالىقارالىق كينوفەستيۆالدە «شەتەلدىڭ ۇزدىك فيلمى» جۇلدەسىن يەمدەنگەن بولاتىن.

 مامىر ايىنىڭ سوڭىندا «ورالمان» فيلمى اۆستريادا وتەتىن حالىقارالىق كينوفەستيۆالدە كورسەتىلەتىن بولادى. سونىمەن قاتار «اق ءىلبىرىس» كينوجۇلدەسىنىڭ «الەمدىك كينەماتوگرافقا سىڭىرگەن ەڭبەگى ءۇشىن» مارتەبەلى جۇلدەسى قازاقستاننىڭ حالىق ءارتيسى، تانىمال اكتەر نۇرجۇمان ىقتىمبايەۆقا تابىستالدى.

 2012 -جىلى قىرعىزستاننىڭ تانىمال كينەماتوگرافيستەرى ۇيىمداستىرعان «اق ءىلبىرىس» اتتى تۇڭعىش ۇلتتىق كينوجۇلدەسى وتكەن جىلدىڭ ۇزدىك فيلمدەرىن انىقتايتىن ەلەۋلى ءىس- شارا. كينوجۇلدە قىرعىزستاننىڭ كينەماتوگرافيستەر وداعى، «ايتىش» قوعامدىق ۇيىمى جانە قىرعىزستان رەسپۋبليكاسىنىڭ كينو دامىتۋ قورى قولداۋىمەن وتەدى. «ورتالىق ازيانىڭ ۇزدىك ءفيلمى» نوميناتسياسى 2010 -جىلى العاش تابىستالعان بولاتىن.

بىلتىر مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاقفيلم» اق «نوۆىي مير» ج ش س- ءنىڭ قاتىسۋىمەن تۇسىرىلگەن «اناعا اپارار جول» فيلمى دە «ورتالىق ازيانىڭ ۇزدىك فيلمى» كينوجۇلدەسىمەن ماراپاتتالعان ەدى.

 ايتا كەتسەك، قىرعىزدىڭ رەجيسسەرى اقتان ارىس قۇبات تۇسىرگەن «كەنتاۆر» فيلمى «اق ءىلبىرىس -2018» ۇلتتىڭ جۇلدەسىنىڭ باس جۇلدەسىن جەڭىپ الدى.