وسكەمەندە اقىت ءۇلىمجى ۇلىنىڭ «شولاق قول كەلىنشەك» داستانى ساحنالاندى
90 مينۋتقا سوزىلعان قويىلىم وسكەمەندەگى وبلىستىق دراما تەاترعا تولعان كورەرمەندى ەرەكشە اسەرگە بولەدى. توعىشارلىق پەن تەكتىلىك، ىزگىلىك پەن زۇلىمدىق تايتالاسقا تۇسكەن تارتىسقا تولى ءاپسانانىڭ سيۋجەتى التايدىڭ ار جاعىندا جاساعان اقىت ءۇلىمجى ۇلىنىڭ «شولاق قول كەلىنشەك» داستانىنىڭ نەگىزىندە ءوربىدى.
كوزىنىڭ الدىنداعىسىن عانا ويلايتىن قارىنبايدىڭ، دۇنيە-مۇلىك پەن رۋحاني داۋلەتكە تەڭدەي كەمەل بايتۇگەلدىڭ وبرازدارى ارقىلى اقىن اق پەن قارانىڭ ماڭگىلىك كۇرەسىن شەبەر سۋرەتتەگەن. قايىرشىعا ساداقا ۇسىنعانى ءۇشىن قولىنان ايىرىلعان شولاق قول كەلىنشەكتىڭ باسى قاتتى، اياعى ءتاتتى ءومىرى كورەرمەننىڭ كوڭىلىن ءبىر سۋىتىپ، ءبىر ىسىتتى.
«اقىت اقىننىڭ وبرازىن اشۋ وڭاي بولمادى، كوپ ىزدەندىك. ويتكەنى، ول كىسىنىڭ شىعارماشىلىعىمەن تام- تۇمداپ تانىس بولعانىمىزبەن، ءومىرى مەن سۇرگەن ورتاسى تۋرالى اقپارات وتە تاپشى ەكەن. اقىننىڭ رۋحاني مۇراسىن زەرتتەپ جۇرگەن استانا مەن الماتىداعى ادامدارعا جۇگىندىك. استانادان داۋلەتكەرەي كاپ ۇلى كىتاپتارمەن قامداپ، كەڭەسىن بەردى. سونىڭ نەگىزىندە اقىتتىڭ وبرازىن الىپ شىقتىم. ءبىزدىڭ ۇجىم «شولاق قول كەلىنشەك» ءاپساناسىنىڭ اۋراسىنا ءالى دە تەرەڭدەپ ەنە تۇسەدى دەپ ويلايمىن» - دەيدى اكتەر قانات نيازبەكوۆ.
قويىلىمنىڭ رەجيسسەرى ساقان اكەلەيەۆ وبلىستىق دراما تەاتردىڭ رەپەرتۋارى ولجالى دۇنيەمەن تولىققانىن ايتادى.
«بيىل اقىت ءۇلىمجى ۇلىنىڭ تۋعانىنا 150 جىل تولادى. وسىعان وراي، مادەنيەت جانە سپورت مينيسترلىگىنەن اقىت ءۇلىمجى ۇلىنىڭ شىعارماسىن ساحنالاۋ تۋرالى تاپسىرما تۇسكەن بولاتىن. مونعوليانىڭ مادەنيەت قايراتكەرى، اقىن شىناي راحمەت ۇلى ساحناعا بەيىمدەگەن «شولاق قول كەلىنشەك» داستانىن وقىپ شىعىپ، قاتتى تەبىرەندىم. اقىت شىعارماشىلىعىنىڭ شىراقشىسىنا اينالعان گۇلنار وماروۆا مەن ارعى بەتتەگى شىناي اعامىزدىڭ امانات دۇنيەسىنە قيانات جاساماۋ كەرەك دەگەن وي كەلدى. سونىڭ ارقاسىندا قىسقا ۋاقىتتىڭ ىشىندە تۇشىمدى دۇنيە جاساي بىلدىك دەگەن ويدامىن. ءبىرازدان بەرى وسكەمەننىڭ كورەرمەنى ءبىزدى بۇلايشا ساحنادان جىبەرمەي قوشەمەتتەمەپ ەدى. سوعان قاراعاندا پرەمەرا ءساتتى وتكەن ءتارىزدى» - دەيدى رەجيسسەر.
ساقان اكەلەيەۆ بۇل قويىلىم تامىز ايىندا الماتىدا ساحنالاتىنىن ايتادى.
«تۇرىكسوي» حالىقارالىق ۇيىمىنا بۇكىل تۇركى الەمىنە ورتاق اقىننىڭ داستانىن تۇركيا، ازەربايجان ەلدەرىندە ساحنالاۋدى ۇسىنىپ وتىرمىز. موڭعوليا، قىتاي ەلدەرىندەگى قازاقتارعا دا تارتۋ ەتسەك دەگەن ويىمىز بار» - دەيدى ول.
