كيم يو چەن- كورەيارالىق سامميتتەگى جالعىز ايەل
بۇل تۋرالى Baq.kz اقپارات اگەنتتىگى CNN باسىلىمىنا سىلتەمە جاساپ حابارلايدى.
كيم يو چەن ءوزىنىڭ تۋعان اعاسى سولتۇستىك كورەيا كوشباسشىسى كيم چەن ىننىڭ قاسىندا وتىردى. تاريحي سامميتكە پحەنيان تاراپىنان قاتىسىپ جاتقان 6 ادامنىڭ اراسىنداعى جالعىز ايەل ادام وسى كيم يو چەن.
جۋرناليستەر كيم چەن ىننىڭ قارىنداسى اعاسىنا كومەك بەرىپ، قولداۋ تانىتىپ قانا قويماي، وزىنە كوپشىلىكتىڭ نازارىن قاتتى اۋدارۋعا تىرىسۋدا دەپ جازۋدا. 30 جاستاعى قىزدىڭ ەكى ەل اراسىنداعى قارىم- قاتىناستا ءوز قولتاڭباسى بار. سەبەبى، سولتۇستىك كورەيانى باسقارىپ وتىرعان كيم اۋلەتىنەن 1953 -جىلى كورەيارالىق سوعىس اياقتالعالى بەرى وڭتۇستىك كورەيا جەرىنە اياق باسقان العاشقى ايەل ادام دا وسى كيم يو چەن. ەكى ەل اراسىنداعى قارىم- قاتىناس وليمپيادا ويىندارىنان سوڭ جاندانا باستاعان كەزدە، اعاسىنىڭ اتىنان سەۋل باسشىسى مۋن چجە ينعا ارنايى حاتتى الىپ كەلىپ تە تاريحتا قالدى.
كيم يو چەن 2014 -جىلى سولتۇستىك كورەيا بيلىگىندەگى پارتيانىڭ ۇگىت- ناسيحاتتاۋ جۇمىستارى بويىنشا دەپارتامەنت ديرەكتورىنىڭ ورىنباسارى بولىپ سايلاندى. ال سەۋل ۇكىمەتى كيم يو چەندى 2014 -جىلى اعاسىنىڭ ورنىنا ەل باسقارعان ماڭىزدى شەنەۋنىك دەپ تانيدى. ويتكەنى، ءدال وسى جىلى كيم چەن ىن قانت ديابەتى دەرتىنە شالدىعىپ، ۋاقىتشا ەل بيلەۋ قابىلەتىنەن ايىرىلعان بولاتىن.
دەگەنمەن، كيم حانىم ءوز اۋلەتىنىڭ ءاربىر مۇشەسى سەكىلدى وتە قۇپيا ادام، ول تۋرالى جەكە مالىمەتتەر جوقتىڭ قاسى. اعاسى كيم چەن ىن سياقتى شۆەيتساريادا ءبىلىم العانى بەلگىلى. ول كيم چەن يردىڭ ءتورت ايەلىنەن تۋعان 7 بالانىڭ ەڭ كىشىسى. جەتى بالانىڭ انالارى ءارتۇرلى بولعانىمەن، كيم چەن ىن مەن كيم يو چەن - ءبىر انا، ءبىر اكەدەن تۋعان باۋىرلار.
كيم يو چەن اكەسىنە جاقىن بولعاندىقتان، شۆەيتساريادان كەلگەن سوڭ بىردەن مەملەكەتتىك لاۋازىمدى قىزمەتتەردى اتقارعان. بۇل تۋرالى North Korea Leadership Watch بلوگىن جۇرگىزەتىن مايكل مەددەن حابارلايدى. بىلتىرعى جىلدان باستاپ كيم يو چەن كوممۋنيستىك پارتيانىڭ ورىنباسارى قىزمەتىنە بەكىتىلدى. نازىك جاندى ەكەنىنە قاراماستان، سولتۇستىك كورەياداعى توپ-20 شەنەۋنىكتەر قاتارىنا قوسىلعان.
اعىلشىن تىلىنەن اۋدارعان
التىناي قۋانىشبەك
