شىمكەنتتىك بەلگىلى اقىن ءوزىن رەنجىتكەن قايرات نۇرتاسقا وكپەسىن ايتتى

استانا. قازاقپارات - تالاي حيت اندەردىڭ ءماتىنىن جازعان قۇرماناي باقتيار قىزىنىڭ قايرات نۇرتاسقا دەگەن وكپەسى قارا قازانداي.

حيتمەن كونسەرت نە توي كەزىندە ءان اۆتورلارىن اتامايتىن كورىنەدى. NUR. KZ تىلشىسىنە سۇحبات بەرگەن اقىن ءبىراز انشىلەردىڭ شىنايى بەتپەردەسىن اشتى.

«مەنىڭ رەنىشىم بار. قايرات نۇرتاس پەن الىشەر كارىموۆ اندەردىڭ اۆتورىن ايتۋدى ۇمىتىپ كەتەدى. ول اندەردىڭ ولەڭىن مەن جازعانمىن. مىسالى، ماقپال اپام تويدىڭ ىشىندە اندەردىڭ اۆتورلارىن ايتادى. ءبىزدىڭ ولەڭىمىزدى ايتىپ ءجۇرىپ، توي بىلاي تۇرسىن، كونسەرتتە دە اتىمىزدى اتامايدى. مۇمكىن ولار ۇمىتىپ قالاتىن شىعار ءان اۆتورلارىنىڭ كىم ەكەنىن. مۇمكىن ولاردىڭ ديرەكتورلارى جۇمىس ىستەيتىن شىعار. ماقپال اپامىزدان ۇلگى السا ەكەن.

بۇرىنعى اپالارىمىزدىڭ بارلىعى اۆتورلارىن ايتقان. ويتكەنى، اللادان كەيىن اۆتورلاردىڭ ارقاسىندا دۇنيەگە كەلگەن ءان كومپوزيتوردىڭ ءسابيى بولسا، ءسوز مەنىڭ ءسابيىم. مەن بار كەزدە ارينە ايتادى. مەنى كورىپ تۇرادى عوي. مەن جوق جەردە ايتا بەرمەيدى.

ماقپال اپام قاسىندا اۆتورلاردىڭ ەشقايسىسى جوق بولسا دا، ايتىپ ءجۇر عوي. مەن كونسەرتىنە بارسام عانا ايتادى. كەيبىر كەزدەردە ايتپاي قويادى. كەيدە ۇمىتىپ كەتەتىن شىعار. ءبىراق اۆتورلاردى ۇمىتۋ مۇمكىن ەمەس. قۇلاقتارىنا التىن سىرعا!» ، - دەيدى قۇرماناي باقتيار قىزى.

قايرات نۇرتاستىڭ ورىنداۋىنداعى «الماتىنىڭ تۇندەرى- اي» ءحيتىنىڭ اۆتورى ارزانقول اقىنداردىڭ قاتارىنان ەمەسپىن دەيدى. ءبىراق باقتيار قىزىنىڭ كوڭىلىن تاپقان ءانشى كوڭىلگە قونىمدى ءماتىندى جازدىرىپ الادى ەكەن.

«مەن ارزان ەمەس ەكەنىمدى بىلەمىن. كەيدە ساۋدالاسىپ جاتاتىن انشىلەر بولادى. كەيدە ساۋدالاسپاي، شىنايى نيەتپەن، ەگەر مەنىڭ كوڭىلىمنەن شىقسا، قالاماقىنى ودان اسىرىپ بەرەمىن دەيتىندەر بولادى. سوندىقتان اركىم ءارتۇرلى. بەس ساۋساق بىردەي ەمەس قوي. جاعدايىن ايتقان كەزدە تۇسىنۋگە تىرىسامىن» ، - دەيدى باقتيار قىزى.

قۇرمانايدى توسىن- سىيمەن قۋانتاتىن جۇلدىزدار دا جەتەرلىك كورىنەدى. جاقىندا بەيتانىس جان اقىنعا سۋ جاڭا كولىك مىنگىزسە، ەندى انشىلەردىڭ كومەگىمەن باسپانالى بولۋدى ارمانداپ جۇرگەنىن جاسىرمادى.

«ماشينا، پاتەر العاندى جاقسى كورەمىن نەگىزى. ازىرگە پاتەر ەشكىم بەرگەن جوق، كولىك بەردى. كىمنىڭ سىيلاعانىن ايتپايمىن. ول قۇپيا. ول كىسى ءوزى جاريا قىلۋدى قالامادى. الداعى ۋاقىتتا پاتەر بەرىپ جاتسا، شىن العىسىن ءبىلدىرىپ، وسىنداي قىزدارىمىز دەپ قادىرىمىزدى ءبىلىپ جاتسا، نەگە حالىقتىڭ ورتاسىندا ەركەلەپ، بەرگەن دۇنيەنى الماسقا» ، - دەيدى قۇرماناي.