تۇركيا پرەزيدەنتى وزبەكستانعا ساپارمەن بارادى

استانا. قازاقپارات - تۇركيا پرەزيدەنتى رەدجەپ ەردوعان وزبەكستانعا مەملەكەتتىك ساپارمەن بارادى، دەپ حابارلايدى قازاقپاراتتىڭ تاشكەنتتەگى مەنشىكتى ءتىلشىسى.

وزبەكستان سىرتقى ىستەر مينيسترلىگىنىڭ حابارلاۋىنشا، رەجەپ ەردوعاننىڭ وزبەكستانعا ساپارى 29 - ساۋىردەن 1 - مامىرعا دەيىن جالعاسادى.

تۇركيا پرەزيدەنتىنىڭ وزبەكستانعا مەملەكەتتىك ساپارى اياسىندا قوس مەملەكەت اراسىنداعى كوپ جوسپارلى ىنتىماقتاستىقتى دامىتۋ جولدارى تالقىلانادى. حالىقارالىق جانە ءدىني كۇن تارتىبىندە، اتاپ ايتقاندا جاھاندىق جانە ايماقتىق سىن- قاتەرلەرگە ەرەكشە نازار اۋدارىلادى.

سونىمەن بىرگە، تۇركيا پرەزيدەنتى وزبەكستاننىڭ وليي ءماجىلىسى پالاتالارىنىڭ بىرلەسكەن وتىرىسىندا ءسوز سويلەيدى.

ەكى ەل باسشىلارى وزبەكستان مەن تۇركيانىڭ جەتەكشى بانكتەرىنىڭ، كومپانيالارى مەن فيرمالارىنىڭ باسشىلارمەن بىرلەسكەن بيزنەس- فورۋمعا قاتىسادى. ودان بولەك، ساپار باعدارلاماسىندا تۇركيا دەلەگاتسياسىن بۇحارا قالاسىنا اپارۋ جوسپارلانعان.

وزبەك- تۇرىك سامميتىنىڭ قورىتىندىسى بويىنشا، مەملەكەت باسشىلارىنىڭ ەكىجاقتى قارىم- قاتىناستىڭ قازىرگى جاي- كۇيى مەن ودان ءارى دامۋىنا باعا بەرەتىن بىرلەسكەن مالىمدەمەسى قابىلدانادى.

سونداي- اق، ساپار اياسىندا ءتۇرلى سالالار بويىنشا مەملەكەت ارالىق، ۇكىمەت ارالىق جانە ۆەدومستۆو ارالىق قۇجاتتار پاكەتىنە جانە ينۆەستيتسيالىق كەلىسىمدەرگە قول قويۋ جوسپارلانعان.

فوتو: www.tarimkon.org

ايجان سەرىكجان قىزى