سپورتشىلاردى دوپينگتەن اۋلاق ۇستاۋىمىز كەرەك - قازاقستان ۇلتتىق وليمپيادا كوميتەتى
سەميناردى ق ر مادەنيەت جانە سپورت مينيسترلىگىنىڭ قولداۋى ارقاسىندا جانە «وليمپيادالىق ىنتىماقتاستىق» باعدارلاماسى اياسىندا قازاقستان ۇلتتىق وليمپيادا كوميتەتى ۇيىمداستىرىپ جاتىر.
قازاقستان ۇ و ك پرەزيدەنتى تيمۋر قۇلىبايەۆ سپورتتا جوعارى ناتيجەگە جەتۋ ءۇشىن مەديتسينا-بيولوگيالىق جابدىقتاۋدى جەتىلدىرۋ، انتيدوپينگ قىزمەتىنىڭ جۇمىسىن جاقسارتۋ مەن سپورتتاعى تىيىم سالىنعان ءدارى-دارمەكتەرگە قارسى جۇمىستى نىعايتۋ كەرەك ەكەنىن ۇنەمى ايتۋدا. بۇل ماسەلەلەردى تالقىلاۋ ءۇشىن اتالمىش سەمينار ۇيىمداستىرىلدى.
«قازاقستان ۇ و ك پرەزيدەنتى تيمۋر قۇلىبايەۆ دوپينگكە قاتىستى قاتاڭ ساياسات جۇرگىزۋدە. ريو وليمپياداسى الدىندا ءبىز سپورتشىلارىمىزدىڭ اناليزدەرىن درەزدەندەگى انتيدوپينگتىك لابوراتورياعا جىبەرگەنبىز. پحەنچحان وليمپياداسى الدىندا دا سويتتىك. قازىرگى تاڭدا ءبىزدىڭ ناتيجەلەرىمىز جاقسى. ارى قاراي دا سپورتشىلارىمىزعا جاقسى مەديتسينالىق قىزمەت كورسەتىپ، دوپينگتەن اۋلاق ۇستاۋعا اتسالىسامىز. قازاقستان ۇ و ك جۇمىسى وتاندىق سپورتتى دامىتۋعا باعىتتالعان، ءبىزدىڭ باستى ماقسات - جاس سپورتشىلارىمىزعا دۇرىس جول كورسەتۋ»، - دەدى ۇلتتىق وليمپيادا كوميتەتىنىڭ باس حاتشىسى دانيار ابۋلعازين.
سەمينارعا گەرمانيا، ا ق ش، چەحيا، ۆەنگريا جانە ت م د ەلدەرىنەن تاجىريبەلى ماماندار شاقىرىلدى.
«بۇگىنگى سەمينار سپورتتى جوعارى دەڭگەيگە كوتەرۋدەگى جولداردىڭ ءبىرى. بۇل جيىنعا وليمپيادا مەنەدجەمەنتىنىڭ وكىلدەرى، دەنساۋلىق ساقتاۋ وكىلدەرى، سپورت مەديتسيناسىنا قاتىستى ماماندار جينالدى. مۇنداي ءبىر توپ مامانداردىڭ ءبىر جەردە جينالىپ، تاجىريبە الماسۋى - وزىندىك وليمپيادا دامۋ جۇيەسىنىڭ قۇرۋىنا كوپ ىقپال ەتەدى. سوندىقتان بۇل سەمينار ماڭىزدى دەپ ايتۋعا بولادى»، - دەدى پروفەسسور ۆلاديمير پلاتونوۆ.
ولار ەكى كۇنى بويى قازاقستاندىق ارىپتەستەرىمەن تاجىريبە الماسادى. سەمينار بارىسىندا انتيدوپينگتىك باعدارلارمالارعا كوپ كوڭىل بولىنەدى.
300 گە جۋىق قاتىسۋشىلار (ۇلتتىق سپورت مەديتسينا مەن انتيدوپينگ فەدەراتسياسىنىڭ وكىلدەرى، عىلىمي- جيىنتىق توپتاردىڭ ماماندارى، دەنە شىنىقتىرۋ مەن سپورت باسقارماسىنىڭ باسشىلارى، وبلىستىق ساۋىقتىرۋ ديسپانسەرلەردىڭ ماماندارى، مەديتسينا مەن ءبىلىم ۇيىمداردىڭ وكىلدەرى) ەكى سەكسياعا ءبولىندى. ونىڭ بىرەۋى سپورت دارىگەرلەرىنە ارنالسا، ەكىنشىسى قازاقستاندىق باپكەرلەرگە ارنالعان «زاماناۋي سپورت جاتتىعۋلارى» ماسەلەسىن قاراستىردى. سەمينار بۇگىندە جالعاسىن تابادى.
اۆتور: كۇنسۇلتان وتارباي
