تۇرمەگە زاڭسىز زاتتاردى درونمەن تاسي باستادى - ۇلتتىق ۇلان باس قولباسشىسى

استانا. قازاقپارات - بۇگىن ق ر ىشكى ىستەر مينيسترلىگىنىڭ قوعامدىق كەڭەسىندە ۇلتتىق ۇلاننىڭ قىزمەتى قارالدى.

وسى ورايدا اتالعان قۇرىلىمنىڭ باس قولباسشىسى، گەنەرال-لەيتەنانت رۋسلان جاقسىلىقوۆ تۇزەتۋ مەكەمەلەرىنىڭ قاۋىپسىزدىگىن قامتاماسىز ەتۋ سالاسىنداعى جەتىستىكتەردى ەرەكشە اتاپ ءوتتى، دەپ حابارلايدى قازاقپارات ءتىلشىسى.

«ەستەرىڭىزدە بولسا، 2000-جىلى تۇزەۋ مەكەمەلەرىندەگى ءتارتىپتى باقىلاۋ قىزمەتى ادىلەت مينيسترلىگىنە بەرىلگەن بولاتىن. سول كەزدە ءبىز اتالعان فۋنكسيانى تاپسىردىق. سوسىن اقمولا وبلىسىنداعى مەكەمەلەردە جاپپاي تارتىپسىزدىكتەر بولدى. ودان كەيىن ءبىزدىڭ قاراۋىلدارعا شابۋىل جاسالدى. ال ماڭعىستاۋ وبلىسىندا ءبىر توپ جازاسىن وتەۋشى تۇرمەدەن قاشىپ كەتتى. بالقاش جاقتا تەرروريستىك اكتىلەرگە قارسى شارا قولداندىق. مىنە، وسى وقيعالاردان كەيىن سوتتالعانداردى باقىلاۋ فۋنكتسياسى قايتادان بىزگە بەرىلدى»، - دەيدى ر. جاقسىلىقوۆ.

ۇلتتىق ۇلاننىڭ باس قولباسشىسىنىڭ سوزىنە قاراعاندا، باس كەزىندە تارتىپكە باعىنباۋدىڭ 400 گە جۋىق ارەكەتى تىركەلسە، ءبىر جىلدان كەيىن اتالعان كورسەتكىش ەكى ەسەگە ازايدى.

«سوسىن تۇزەۋ مەكەمەلەرىنە زاڭسىز زاتتاردى كىرگىزۋ جاعدايلارى كۇرت تومەندەدى. مىسالى، باستاپقىدا ءبىز جىل سايىن 3 مىڭ سپيرتتىك ىشىمدىكتەردى تاركىلەپ وتىردىق. بۇگىندە ول كورسەتكىش تە ازايدى. ءبىراق ونداي وقيعالار ءالى دە بار. ونى مويىندايمىز. ىشىمدىك زاتتاردى كولىكپەن كىرگىزۋگە تىرىسادى. توسقاۋىلدار ارقىلى لاقتىرادى. قازىر باسقا جولدارىن دا تاۋىپ جاتىر. پيلوتسىز ۇشۋ اپپاراتتارىمەن، ياعني دروندارمەن تۇرمەگە زاڭسىز زاتتاردى جەتكىزۋ فاكتىلەرى دە تىركەلە باستادى»، - دەپ اتاپ كورسەتتى ر. جاقسىلىقوۆ.