قازاقستان چەحياعا اۆتوكولىكپەن جۇك تاسىمالداۋ ءۇشىن قوسىمشا رۇقسات بلانكىلەرىن الادى
كەزدەسۋ بارىسىندا تاراپتار ەكىجاقتى ىنتىماقتاستىقتى تالقىلاپ، ەكى ەل اراسىندا جۇك تاسىمالداۋ ماسەلەسى جونىندە اقپارات الماستى. سونداي-اق، تاسىمالداۋعا قوسىمشا رۇقسات بلانكىلەرىنىڭ كولەمىن بەلگىلەدى.
2017-جىلى قازاقستان مەن چەحيا اراسىندا جۇك تاسىمالداۋدا وڭ ديناميكا بايقالدى. جىل قورىتىندىسى بويىنشا اۆتوموبيل كولىگىمەن جۇك تاسىمالداۋ كولەمى بۇل باعىتتا %17 ءوسىپ، 17,9 مىڭ توننانى قۇرادى. نەگىزگى تاسىمالداناتىن جۇكتەر قاتارىندا جابدىقتار، ەلەكتروندىق تەحنيكالار جانە حالىق تۇتىناتىن تاۋارلار بار.
بۇل باعىتپەن جۇرۋشىلەردىڭ كوپتىگىنە بايلانىستى ەكى تاراپ 2018-جىلى جان-جاقتى رۇقسات بلانكىلەرىنىڭ كولەمىن 600 گە (بارلىعى 1400)، ءۇشىنشى ەلدەرگە جانە ءۇشىنشى ەلدەردەن تاسىمالداۋعا رۇقسات بەرەتىن بلانكىلەر سانىن 200 گە (بارلىعى 400) دەيىن ۇلعايتۋعا كەلىستى.
بيىلعى جىلدىڭ رۇقسات بلانكىلەرى 2019-جىلدىڭ 1- اقپانىنا دەيىن جارامدى بولادى.
