دانيار ەلەۋسىنوۆ: قازاقستاننىڭ اتىنان شىعۋ - وتانىمدى الەمگە پاش ەتۋ
- «باركلايز ورتالىقتا» ايقاسقا شىعۋدى ءسىز قالاي قابىلدايسىز؟
- بىرىنشىدەن، بۇل مەن ءۇشىن دەبيۋت. «باركلايز ورتالىقتا» رينگكە شىعىپ، ول جاقتاعى كەشتە ونەر كورسەتۋ - بۇل جاقسى باستاما دەگەن ويدامىن.
- قازىر قازاقستانداعى كوپتەگەن بوكسشىلار كاسىبي بوكسقا اۋىسىپ جاتىر. سەن ءۇشىن قازاقستاننىڭ اتىنان شىعۋ نەنى بىلدىرەدى؟
- قازاقستاننىڭ اتىنان شىعۋ - وتانىمدى الەمگە پاش ەتۋ. ءوز ەلىمنىڭ نامىسىن قورعايتىنىمدى ماقتان تۇتامىن.
- كاسىبي بوكستا قانداي ءادىس-امالمەن رينگكە شىعاسىز؟ سەنىڭ ءادىسىڭ GGG- ءدىڭ مەكسيكالىق ادىسىنە ۇقسايتىن بولا ما، الدە وزىندىك جولىڭ بار ما؟
- شىنىمدى ايتسام، گەننادي مەكسيكالىق ءادىستىڭ بوكسشىسى دەپ ايتپاس ەدىم. مەنىڭ ويىمشا، ول ءوزىنىڭ قازاقى ءادىسىن ۇمىتقان جوق. تەك سوققىنى كوپ جاسايتىن بوكسقا قاراي بەيىمدەلىپ الدى. مەكسيكالىقتار جاقىن جانە ورتا قاشىقتىقتى جۇدىرىقتاسۋدى ۇناتادى. ال گەنا وزىنە ىڭعايلى ءادىس-امالدى قولايلى كورەدى. سوندىقتان، مەن دە ءوزىمنىڭ تاكتيكامدى ۇستانامىن. البەتتە، مەن بارلىق ءادىس-امالدى مەڭگەرگىم كەلەدى.
- سەنىڭ بارلىق ءادىس-امالدى مەڭگەرگىڭ كەلەتىنى ماقتاۋعا تۇرارلىق. ول ساعان كەلەشەكتە كوپ كومەكتەسەرى ءسوزسىز...
- ءيا، ارينە. مەنىڭشە، كەز كەلگەن سپورتشى ءبىر ورىندا تۇرىپ قالماي، ءاردايىم ءوزىن دامىتا ءبىلۋى كەرەك. مەن وليمپيادا چەمپيونىمىن، ءبارىن بىلەمىن دەمەيمىن. مەن دە كوپ وقىپ، وتكەن جانە وسى عاسىردىڭ ۇزدىك بوكسشىلارىنىڭ تاجىريبەسىن جيناقتاعىم كەلەدى. ولاردىڭ ەڭ ۇزدىك قىرلارىن ۇيرەنسەم دەيمىن.
- سەن وليمپيادا ويىندارىنىڭ التىن مەدالىن يەلەندىڭ. قازىر كاسىبي بوكستاسىڭ. كاسىبي بوكسقا قالاي جولىڭ ءتۇستى؟
- مەن قازاقستانداعى جەتىنشى وليمپيادا چەمپيونىمىن، ازىرگە ەڭ سوڭعىسىمىن. العاشىندا قازاقستانداعى ەكى دۇركىن وليمپيادا چەمپيونى بولۋ ءۇشىن توكيوعا بارعىم كەلگەن ەدى. ەكى وليمپيادا ويىندارىنا قاتىسقانىمدى ەسكەردىم دە، اقىرى قازاقستاندا ۇزدىك بولۋدى ەمەس، الەمدەگى ۇزدىك بوكسشى بولۋدى ماقسات ەتتىم.
- سەن وسى سەنبىدە شارشى الاڭعا شىعاسىڭ. ەمتيحاننان ءوتتىڭ دەلىك. جارتىلاي ورتاشا سالماقتا كىممەن ايقاسقىڭ كەلەدى؟
- ءوز كارەرامدا قالاي وسەتىنىمە بايلانىستى... البەتتە، ەڭ ۇزدىكتەرمەن - چەمپيوندارمەن ايقاسقان جاقسى بولار ەدى. جەتكەن كەزىمدە بۇل تيتۋلداردىڭ كىمدە بولاتىنى ماڭىزدى ەمەس. سپەنستە نەمەسە تۋرماندا بولسىن ءبارىبىر.
- جارتىلاي ورتاشا سالماقتاعى سەنىڭ ديۆيزيونىڭدا مىقتى بوكسشىلار كوپ سەكىلدى...
- ءيا، بۇل مەنىڭ تابيعي سالماعىم. سوندىقتان، باسقا نۇسقا ازىرگە مەندە جوق.
- سەن قازاقستانداعى فاناتتارىڭا نە ايتار ەدىڭ؟
- بارلىعىنا سالەم ايتقىم كەلەدى. مەن ءۇشىن تاقىم قىسىڭىزدار. ارينە، مەنىڭ جەرلەستەرىم ماعان كوبىرەك قولداۋ كورسەتەتىن بولادى. ءبىراق، وسىندا دا جانكۇيەرلەرىمنىڭ بار بولعانىن قالايمىن.
ايان بەكەن ۇلى
