اسقار مامين الماتى ءوڭىرىنىڭ تۋريستىك الەۋەتىمەن تانىستى

استانا. قازاقپارات - ق ر پرەمەر- ءمينيسترىنىڭ ءبىرىنشى ورىنباسارى اسقار مامين الماتىعا بارعان جۇمىس ساپارىندا وڭىردە تۋريزمدى دامىتۋ ماسەلەلەرى تۋرالى جينالىس وتكىزدى، دەپ حابارلادى ق ر پرەمەر- ءمينيسترىنىڭ ءبىرىنشى ورىنباسارىنىڭ حاتشىلىعى.

 «مەملەكەت باسشىسى نۇرسۇلتان نازاربايەۆ قازاقستانداعى تۋريزمدى دامىتۋعا ەرەكشە نازار اۋدارادى. ءوزىنىڭ جىل سايىنعى جولداۋىندا ەلباسى ىشكى جانە سىرتقى تۋريزمدى دامىتۋدى وڭىرلەردەگى ەكونوميكالىق دامۋ مەن جۇمىس ورىندارىن قۇرۋدىڭ نەگىزى دەپ كورسەتكەن بولاتىن»، - دەپ اتاپ ءوتتى ا. مامين.

ونىڭ ايتۋىنشا، الماتى مەن الماتى وبلىسى ءوزىنىڭ گەوگرافيالىق، تاريحي جانە تابيعي ەرەكشەلىكتەرىنىڭ ارقاسىندا قازاقستانداعى تۋريزمدى دامىتۋدىڭ ۇلكەن الەۋەتىنە يە.

جينالىستا ءسوز سويلەگەن الماتى اكىمى باۋىرجان بايبەك ەلباسىنىڭ تاپسىرماسىنا سايكەس، مەگاپوليستە تۋريزمدى ەكونوميكانىڭ جاڭا درايۆەرى رەتىندە دامىتۋ بويىنشا جۇيەلى جۇمىستار جۇرگىزىلىپ جاتقانىن ايتتى. قالانىڭ «تۋريزمدى دامىتۋعا 100 قادام» جوسپارى قۇرىلعان، الماتى ەكونوميكاسىنىڭ 87 پايىزى قىزمەت كورسەتۋ سالاسى قۇرايدى، قازاقستاننىڭ ءاربىر ەكىنشى شەتەلدىك قوناعى الماتىعا كەلەدى.

2018 - جىلدىڭ سوڭىنا دەيىن استانا مەن الماتى ارقىلى ۇشاتىن قىتاي مەن ءۇندىستان ازاماتتارى ءۇشىن 72 ساعاتتىق ۆيزاسىز ترانزيت ىسكە قوسىلادى. جاقىن ارادا ولار ءۇشىن ەلەكتروندى ۆيزا پيلوتتىق رەجىمدە ەنگىزىلەدى. سونداي- اق، الماتى وبلىسىندا ءىرى ينۆەستيتسيالىق جوبالار باستالادى: مەدەۋ، شىمبۇلاق، اقبۇلاق، تاباعان بازالارىن جاقسارتۋ، تاقىرىپتىق پاركتەردى سالۋ، ۇلكەن الماتى ارناسى جانىندا تۋريستىك- سپورتتىق ايماق تۇرعىزۋ جۇمىستارى جۇرگىزىلەدى.

ا. مامين الماتى مەن الماتى وبلىسىنىڭ اكىمدىكتەرىنە جانە مۇددەلى مەملەكەتتىك ورگاندارعا ناقتى تاپسىرمالار بەردى.

اۆتور: ايجان سەرىكجان قىزى