جاقىن ارادا مۇناي باعاسى قۇلدىراي ما؟
مۇناي باعاسى سوڭعى كەزدەرى ۇزدىكسىز ءوسىپ كەلەدى. Brent ماركالى مۇنايدىڭ باررەلى 75 دوللارعا جەتتى. قازىر بۇل كورسەتكىش 73.45 دوللار كولەمىندە. جىل باسىندا مۇنداي باعا ارمان سياقتى بولىپ كورىنگەن.
سوعان قاراماستان دميتريي مارينچەنكو مۇناي باعاسىنىڭ تومەندەۋ ىقتيمالدىلىعى، ونىڭ باعاسىنىڭ ءوسۋ ىقتيمالدىلىعىنان اسىپ كەتەتىندىگىن ايتادى.
«قازىرگى جاسالىپ جاتقان ساۋدا كەلسىمدەرىندەگى مۇنايدىڭ ورتاشا باعاسى - 60 دوللاردىڭ اينالاسىندا. تۇراقتى فاكتورلارعا سۇيەنسەك، نەگىزگى باعا 55-60 دوللار كولەمىندە. گەوساياسي ماسەلەلەردىڭ اسەرىنەن باعا ءسال كوتەرىلۋى مۇمكىن، ءبىراق ول كوپ ەمەس»، - دەيدى ول.
باعا وسىمىنە اسەر ەتەتىن فاكتورلار تۋرالى ايتا كەلە، ساراپشى 2016 -جىلدىڭ قازان ايىندا مۇناي ءوندىرۋشى ەلدەر ءوزارا ءوندىرىس دەڭگەيىن تومەندەتۋ تۋرالى وپەك+ شارتىنا قول قويعانىن جەتكىزدى.
«ساۋد ارابياسى مۇناي ءوندىرۋدى كەلىسىمدە كورسەتىلگەن مەجەدەن دە تومەندەتىپ تاستادى. ۆەنەسۋەلاداعى مۇناي ءوندىرىسى ىشكى قاقتىعىستار ناتيجەسىندە ازايىپ وتىر. قازاقستان كەلسىمگە سايكەس تولىق جۇمىس ىستەپ وتىر»، - دەدى ساراپشى.
باعانىڭ قۇبىلۋىنا اسەر ەتەتىن تاعى ءبىر فاكتور - گەوساياسات.
«سوڭعى جارتى جىل گەوساياسات تۇرعىسىنان العاندا تارتىسقا تولى بولىپ تۇر. ساۋد ارابياسىنداعى مۇراگەرلىك، سيريا اينالاسىنداعى سوعىس پەن تاياۋ شىعىستاعى قاقتىعىستار، سونىمەن قاتار ا ق ش پەن رەسەي تەكەتىرەسى جانە سانكسيالار باعاعا قاتتى اسەر ەتەدى»، - دەدى دميتري مارينچەنكو.
Fitch Ratings ەسەبىنە سايكەس مۇناي باعاسىن تومەندەتۋى مۇمكىن تاعى ءبىر فاكتور بار، ول ا ق ش وندىرەتىن تاقتاتاس مۇنايى.
«قازىر ول ءوندىرىس قارقىندى دامىپ كەلەدى. اتالمىش مۇناي ءوندىرىسىنىڭ كولەمى بيىل تاۋلىگىنە 2 ميلليون باررەلگە جەتۋى مۇمكىن. سونىڭ سالدارىنان ءبىز دەفيتسيت جاعدايىنان پروفيتسيت جاعدايىنا كەتۋىمىز مۇمكىن. بۇل - مۇناي باعاسى بيىل تومەندەي باستايدى دەگەن ءسوز»، - دەيدى ساراپشى.
ا ق ش وندىرۋشىلەر قانداي باعاعا بولسىن توسەلۋگە دايىن. ولار 50-60 دوللار ءتىپتى ودان دا تومەن باعا قالىپتاسسا دا قينالمايدى.
«ا ق ش نارىعىندا باعا رەتتەلمەيدى. بۇل باسەكەلەستەر ءۇشىن وتە پايدالى»، - دەيدى ول.
ساراپشىلار سونىمەن قاتار مۇناي باعاسىنا اسەر ەتەتىن فاكتورلاردىڭ بۇدان دا كوپ بولۋى مۇمكىن ەكەندىگىن ايتادى. بۇل جەردە تەك بولۋى مۇمكىن ءتورت فاكتوردىڭ ەكەۋى عانا ايتىلىپ وتىر.
