دانيار ەلەۋسىنوۆ الەمدى مويىنداتادى - پروموۋتەر
بۇعان دەيىن حابارلانعانداي، وليمپيادا چەمپيونى دانيار ەلەۋسىنوۆتىڭ قارسىلاسى امەريكالىق نوي كيدد (3-0-1,2KO) بولادى. بوكسشىلاردىڭ جەكپە- جەگى 28 - ساۋىردە برۋكليندەگى «Barclays Center» ارەناسىندا وتەدى.
اشىق جاتتىعۋ كەزىندە دانيار ەلەۋسىنوۆ AB BOXING NEWS- تىڭ شەتەلدىك YouTube ارناسىنىڭ تىلشىسىنە كاسىبي بوكسقا كەلۋى جانە بولاشاقتاعى جوسپارلارى تۋرالى ويلارىن ايتىپ بەردى.
- نيۋ- يوركتەگى كاسىبي بوكستاعى العاشقى دەبيۋتىڭىز تۋرالى نە ايتاسىز؟
- نيۋ- يورك - كاسىبي بوكستىڭ «مەككەسى»، ءبارى وسى جەردەن باستالادى. مەن وسىندا جۇرگەنىمە قۋانىشتىمىن جانە بۇل جەردە العاشقى كاسىبي دەبيۋتىمدى وتكىزەتىنىم تىپتەن كەرەمەت.
- اۋەسقوي بوكستان كاسىپقوي بوكسقا اۋىسۋ كەزەڭى قالاي وتەدى؟
- شىنىمدى ايتسام، مەن بوكستى جاقسى كورەمىن. ماعان جاتتىعۋ پروتسەسى، ۇيىمداستىرۋ كەزەڭى قاتتى ۇنايدى. كاسىبي بوكس - ەڭ الدىمەن وتە ۇلكەن شوۋ. اۋەسقوي بوكستا مۇنداي بولمايدى.
- قالاي ويلايسىز، قازاقستاننان شىققان كەلەسى الەم چەمپيونى اتانۋ ءۇشىن سىزگە قانشا ۋاقىت كەرەك بولادى؟
- مەن وتە جىلدام، ءبىراق جۇيەلى تۇردە جوسپارلاپ وتىرمىن. مۇمكىن كەلەسى جىلى بولىپ قالار.
ەلەۋسىنوۆتىڭ پروموۋتەرى ەددي حەرن دە ءوز پىكىرىن ءبىلدىردى.
- سىزدەر بۇل جىگىتتىڭ قانشالىقتى تالانتتى ەكەنىن ءالى جەتكىلىكتى دەڭگەيدە تۇسىنبەي وتىرسىزدار. ول گەنناديي گولوۆكين ەمەس، ول دانيار ەلەۋسىنوۆ. قازىرگى ۋاقىتتا ول قازاقستاننىڭ «التىن بالاسى». گەننادي گولوۆكينمەن سالىستىرعاندا، ءدال قازىرگى ساتىدا ول تانىمالدىقتىڭ مۇلدە باسقا دەڭگەيىندە. قازاقستاندا ول بارلىق پلاكاتتاردىڭ ايناسىنا اينالعان جىگىت. ول كەرەمەت تالانتتى جانە ول ورتاشا سالماق دارەجەسىندە الەم چەمپيونى اتاعىنا يە بولادى.
- ءسىز ونى قالاي تاپتىڭىز؟
- مەن ونى زيانىڭ (اليەۆ- رەد. ) ارقاسىندا تاپتىم. ول كەزدە مەن جاڭا بوكسشىلار ىزدەپ جۇرگەن ەدىم. مەن بۇل جىگىتتى وليمپيادا ويىندارىندا تەلەارنادان كوردىم. سول كەزدە وعان دەگەن قىزىعۋشىلىعىم وياندى. ءسويتىپ، ول تۋرالى GeeBee تۋرنيرىنە قاتىسقان بوكسشىلاردان سۇراي باستادىم. جانە ونىڭ كىم ەكەنىن ءبىلدىم.
سودان كەيىن مەن قازاقستانعا كەلىپ، ەكەۋمىز كەلىسىمشارتقا قول قويدىق. ەندى ول ا ق ش، ۇلى بريتانيا، موناكودا بوكستاسادى. دانياردىڭ كوپ ۇزاماي الەمدىك بوكس جانكۇيەرلەرىنىڭ جۇرەكتەرىن جاۋلاپ الاتىنىنا سەنەمىن، - دەدى ەددي حەرن.
اۋدارما: اباي ابىلاي ۇلى
