وڭتۇستىك كورەيا مەن سولتۇستىك كورەيا باسشىلارى شەكارادا كەزدەسەدى

استانا. قازاقپارات - وڭتۇستىك كورەيا پرەزيدەنتى مۋن چجە ين سولتۇستىك كورەيا باسشىسى كيم چەن ىنمەن ەكى ەلدى ءبولىپ تۇرعان دەماركاتسيا سىزىعىندا كەزدەسەدى.

كيم چەن ىن وڭتۇستىك كورەيا جەرىنە 65 جىلدان كەيىن باراتىن سولتۇستىك كوەريانىڭ العاشقى باسشىسى بولماق.

وڭتۇستىك كورەيا پرەزيدەنتى اكىمشىلىگىنىڭ باسشىسى يم چجون سوكتىڭ حابارلاۋىنشا، كەزدەسۋ 27 - ءساۋىر كۇنى جەرگىلىكتى ۋاقىت بويىنشا ساعات 9:30-دا شەكارادا وتەدى.

ەكى ەل باسشىلارى اراسىنداعى العاشقى كەلىسسوز شەكارادان وڭتۇستىككە قاراي ورنالاسقان پانمۋندجوم كەنتىندە بولادى. وڭتۇستىك كورەيا سامميتتە «كورەي تۇبەگىن يادرولىق قارۋدان ادا ەتۋ، تۇبەكتە مىزعىماس بەيبىتشىلىك ورناتىپ، قوس كورەي ەلى اراسىنداعى قارىم- قاتىناستى دامىتۋ» تالقىلاناتىنىن مالىمدەدى.

سولتۇستىك كورەيا دەلەگاتسياسىنىڭ قۇرامىندا كيم چەن ىننىڭ اپكەسى، اقپان ايىندا پحەنچحانداعى وليمپيادا ويىندارىنىڭ اشىلۋىنا قاتىسقان كيم ە چجون دا بار. يم چجون سوكتىڭ ايتۋىنشا، ەكى ەل باسشىلارى قايىڭ اعاشىن وتىرعىزادى. بۇدان سوڭ ەكى جاق تۇستەنىپ، قوشتاسۋ ءراسىمى وتەدى.

كەلەسى ايدا نەمەسە ماۋسىمنىڭ باسىندا وڭتۇستىك كورەيا مەن سولتۇستىك كورەيا باسشىلارى جانە ا ق ش پرەزيدەنتى دونالد ترامپ قاتىساتىن سامميت وتپەك.

www.azattyq.org