شايسۇلتان شاياحمەتوۆ اتىنداعى «ءتىل- قازىنا» ۇلتتىق ورتالىعى قۇرىلدى
جيىنعا ق ر مادەنيەت جانە سپورت ءمينيسترى ارىستانبەك مۇحامەدي ۇلى، پارلامەنت دەپۋتاتتارى، مەملەكەت جانە قوعام قايراتكەرلەرى، بەلگىلى وتاندىق عالىمدار مەن قوعامدىق ۇيىمداردىڭ وكىلدەرى قاتىستى، دەپ حابارلايدى قازاقپارات ءتىلشىسى.
«العا قويعان ماقسات - وتە كۇردەلى، وتە ماڭىزدى. نەگە دەسەڭىزدەر، ءبىز قازىر ەلباسىنىڭ تاپسىرماسىنا سايكەس، لاتىن الىپبيىنە كوشۋ جۇمىسىن مىندەتتى تۇردە ىسكە اسىرۋىمىز كەرەك. سول اتقارىلار شارۋالاردىڭ ۇلكەن اۋىرتپاشىلىعى دا وسى «ءتىل- قازىنا» ۇلتتىق عىلىمي- پراكتيكالىق ورتالىعىنا تۇسەدى. سول ورتالىقتىڭ جۇمىسىنا ارينە، ءبىز ۇلكەن جەمىس تىلەيمىز. ورتالىقتى باسقارۋعا ەلىمىزدىڭ بەلگىلى ازاماتى، دۇنيەجۇزىنە تانىمال عالىم، سەنات دەپۋتاتى بولعان، قازىرگى كەزدە دە ەلىمىزدەگى ۇلكەن شارالارعا اتسالىسىپ جۇرگەن پروفەسسور عاريفوللا ەسىم اعامىزدى شاقىرىپ وتىرمىز»، - دەدى ورتالىقتىڭ اشىلۋىندا ارىستانبەك مۇحامەدي ۇلى.
مينيستر ورتالىقتى باسقارۋعا كەلىسىم بەرگەن عاريفوللا ەسىمگە العىسىن ءبىلدىردى. ءوز كەزەگىندە فيلوسوفيا عىلىمدارىنىڭ دوكتورى، ق ر ۇلتتىق عىلىم اكادەمياسىنىڭ اكادەميگى، پروفەسسور عاريفوللا ەسىم ورتالىقتىڭ اشىلۋىنا كەلگەن بارلىق ازاماتتارعا راحمەت ايتتى.
«ەلباسىنىڭ تىكەلەي ايتۋىمەن ۇكىمەت «ءتىل- قازىنا» كوممەرتسيالىق ەمەس ورتالىعىن قۇردى. ەڭ باستىسى - ەلباسىنا ريزاشىلىعىمىزدى ءبىلدىرۋىمىز كەرەك. ول كىسى وتكەن جىلى ءۇش نارسە بارىن اتادى: ءبىرىنشى - تاۋەلسىزدىك، ەكىنشى - استانا، ءۇشىنشى - لاتىن ءالىپبيى ءوتۋىمىز. بۇل قازاق ءتىلىنىڭ لاتىن الىپبيىنە ءوتۋى - ءىرى مادەني- تاريحي شارا دەپ تۇسىنەمىز. ءتىلدىڭ تاۋەلسىزدىگى وسى ما دەپ ويلايمىن. ويتكەنى، ءوزىمىزدىڭ جازۋىمىز بولادى. ەل ەسىن جيناپ، حالىق بولىپ جەتىلگەن كەزدە ءوزىن ءبىر بەكزاتتىق جولعا قاراي ىنتالاندىرادى. ياعني، تاۋەلسىز، ءوزىن- ءوزى جەتكىزە الاتىن دارەجەگە جەتۋى كەرەك. دەمەك، قازاقتىڭ لاتىنعا ءوتۋى دە ماڭىزدى. ءبىز ارينە ماماندارمەن، ۇلكەن اعالارمەن اقىلداسا وتىرىپ، دەپۋتاتتارمەن كەڭەسىپ، ىلعي ماسەلەلەردى كوتەرىپ وتىرامىز. ءبىر اڭعارعانىم - وسى ءىس اعىندى سۋ سەكىلدى ءجۇرىپ كەتەدى دەپ تە ايتا المايمىن. اعىندى سۋدا بوگەت جاتۋى مۇمكىن. سول ماسەلەلەردى قالاي الىپ كەتە الامىز؟ بۇنىڭ ءبارى وسىنداعى جانە وبلىستارداعى زيالى قاۋىمعا بايلانىستى»، - دەدى عاريفوللا ەسىم.
ق ر مادەنيەت جانە سپورت مينيسترلىگى ش. شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ- ادىستەمەلىك ورتالىعىن قايتا قۇرۋ ارقىلى شايسۇلتان شاياحمەتوۆ اتىنداعى «ءتىل- قازىنا» ۇلتتىق عىلىمي- پراكتيكالىق ورتالىعىن قۇرىپ وتىر. ورتالىق لاتىن گرافيكاسىنا نەگىزدەلگەن قازاق ءالىپبيىن كوشىرۋ بويىنشا ۆەدومستۆوارالىق جۇمىستاردى ۇيلەستىرۋدى، فيلولوگيا سالاسىندا ىرگەلى جانە قولدانبالى زەرتتەۋلەر جۇرگىزۋدى، سونداي- اق، ورفوگرافيالىق ەرەجەلەردى دايىنداۋدى، ولاردى اپروباتسيادان وتكىزۋ، مەملەكەتتىك ءتىلدى جەدەلدەتىپ وقىتۋدى عىلىمي- ادىستەمەلىك جاعىنان قامتاماسىز ەتەتىن بولادى.
اۆتور: ايان بەكەن ۇلى
