سەنات دەپۋتاتى: اسكەري ۆەدومستۆولارعا بولىنەتىن قارجى نەگە از؟
«جاقىندا عانا حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەلەرى سولتۇستىك قازاقستان وبلىسىندا وتكەن كوشپەلى وتىرىس بارىسىندا ۇلتتىق ۇلان اسكەري ينستيتۋتىنىڭ جابدىقتالۋىمەن جانە وقۋ پروتسەسىنىڭ ۇيىمداستىرىلۋىمەن تانىستى. سونداي-اق، اسكەري ءبىلىم بەرۋ جۇيەسىن دامىتۋ ماسەلەلەرى قاراستىرىلدى. وكىنىشكە قاراي، اسكەري وقۋ ورىندارىنىڭ ماتەريالدىق- تەحنيكالىق جانە وقۋ-ادىستەمەلىك بازاسى ءبىلىم بەرۋ پروتسەسىنە ءتيىستى دەڭگەيدە ۇيىمداستىرۋدى تولىعىمەن قامتاماسىز ەتە المايدى»، - دەدى سەناتور «2018-2020-جىلدارعا ارنالعان رەسپۋبليكالىق بيۋجەت تۋرالى» ق ر زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ كەزىندە.
ونىڭ ايتۋىنشا، ۇلتتىق ۇلان جانە توتەنشە جاعدايلار كوميتەتى باسشىلىعىنىڭ اقپاراتىنا سايكەس، وتكەن جىلدارى جەتكىلىكسىز قارجىلاندىرۋ سەبەبىنەن ۆەدومستۆولىق باعىنىشتى وقۋ ورىندارى عانا ەمەس، وزگە دە بولىمشەلەردىڭ ماتەريالدىق-تەحيكالىق جابدىقتالۋى قاناعاتتانارلىقسىز جاعدايدا قالعان.
«بۇل ماسەلەنى شىعىس قازاقستان وبلىسىنداعى سۋ تاسقىنىنا بايلانىستى سوڭعى وقيعالار راستادى. مەنىڭ سۇراعىم: ۇلتتىق ۇلان مەن ت ج ك وزدەرىنە جۇكتەگەن مىندەتتەرىن ءتيىمدى ورىنداۋ ءۇشىن جىل سايىنعى جەتكىلىكسىز قارجىلاندىرۋ ماسەلەسى قاشان جانە قالاي شەشىلەدى؟»، - دەدى مۇسابايەۆ.
سەناتوردىڭ بۇل سۇراعىنا ق ر ىشكى ىستەر ءمينيسترىنىڭ ءبىرىنشى ورىنباسارى جانات سۇلەيمەنوۆ جاۋاپ بەردى.
«ءوزىڭىز ايتىپ كەتكەندەي، دەپۋتاتتار توبى ەكى ينستيتۋتقا ارنايى بارىپ، وقۋ جاعدايىن تەكسەرىپ، جەكە قۇراممەن كەزدەسكەن. قازىرگى ۋاقىتتا ۇلتتىق ۇلان جانە ت ج د باسشىلارى ۇلتتىق ۇلان ينستيتۋتىنا 375 ميلليون، كوكشەتاۋداعى توتەنشە جاعدايلار ينستيتۋتىنا 275 ميلليون ۇسىنىپ وتىر. ول ارنايى تەحنيكاسى ءۇشىن، كومپيۋتەرلىك تەحنيكاعا جۇمسالادى. وسى ۇسىنىستاردى ناقتى قاراپ وتىرمىز. ناقتىلاۋ بولسا سوعان ەنگىزۋدى كوزدەيمىز. بولماسا 2019-جىلعا قاراستىرىلاتىن بيۋجەتكە ەنگىزەمىز. قازىر وسى ناقتىلاۋ بويىنشا بىزگە 10 ميلليارد قاراجات ءبولىندى. ونىڭ 80 پايىزىن ۇلتتىق ۇلانعا بەرەمىز»، - دەدى سۇلەيمەنوۆ.
