ءومىرزاق شوكەيەۆ: اۋىل شارۋاشىلىعى سالاسىندا تەك ءتيىمدى سۋبسيديالار قالادى
بۇل تۋرالى پارلامەنت سەناتىنىڭ جالپى وتىرىسىندا «2018-2020-جىلدارعا ارنالعان رەسپۋبليكالىق بيۋجەت تۋرالى» زاڭ جوباسىن تالقىلاۋ بارىسىندا ق ر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى ءومىرزاق شوكەيەۆ ءمالىم ەتتى، دەپ حابارلايدى قازاقپارات ءتىلشىسى.
«بىزدە اۋىل شارۋاشىلىعىن سۋبسيديالاۋ جۇيەسى وتە كۇردەلەنىپ كەتكەنىن وزدەرىڭىز بىلەسىزدەر. قازىر 54 سۋبسيديانىڭ ءتۇرى بار. نەگىزگى باعىتىمىز بۇل سۋبسيديالاردى جەڭىلدەتۋگە ارنالعان. بيىلدىڭ وزىندە 42 سۋبسيديانى قالدىرماقپىز، ونىڭ ىشىندە تيىمسىزدەرىن قىسقارتىپ، ءتيىمدى جولدارىن ىزدەيمىز. بىرىنشىدەن، نەسيە الاتىندارعا ونىڭ پايىزىن تومەندەتۋ ماسەلەسىنە كوبىرەك كوڭىل بولەمىز. ودان كەيىن ينۆەستيتسيالىق سۋبسيديالاردى كوبەيتەمىز»، - دەدى شوكەيەۆ.
وسى ورايدا مال شارۋاشىلىعى سالاسىنا توقتالعان ول، ەت پەن ءسۇت ءوندىرۋ باعىتتارىنا ەرەكشە ەكپىن قويىلاتىنىن اتاپ ءوتتى. سونىمەن قاتار سۋارمالى جەرلەردى كەڭەيتىپ، بۇل ەگىستەردى ءتيىمدى پايدالانۋعا باسىمدىق بەرىلەدى.
«سۋبسيديا تۋرالى بارلىق وزگەرىستەردى اۋىل شارۋاشىلىعى مينيسترلىگىنىڭ سايتىنا ەكى اي بۇرىن ورنالاستىرعانبىز. سودان بەرى كاسىپكەرلەرمەن، اكىمدەرمەن جانە باسقا دا مۇددەلى ورگاندارمەن تىعىز جۇمىستاردى اتقارىپ جاتىرمىز. جاقىن ارادا وسى ماسەلە بويىنشا باسپا ءسوز ءماسليحاتىن وتكىزەمىز»، - دەدى ءومىرزاق شوكەيەۆ.
