حوككەي: قازاقستان قۇراماسى ەكىنشى رەت ءىرى ەسەپپەن جەڭىسكە جەتتى

استانا. قازاقپارات - ءبىرىنشى ديۆيزيون اراسىندا بۋداپەشتە ءوتىپ جاتقان الەم چەمپيوناتىندا قازاقستان قۇراماسى ەكىنشى كەزدەسۋىندە دە ءىرى ەسەپپەن جەڭىسكە جەتتى، دەپ حابارلايدى قازاقپارات ءتىلشىسى.

بۇل جولى عالىم مامبەتاليەۆتىڭ شاكىرتتەرى ۇلى بريتانيا قۇراماسىمەن كۇش سىناستى.

ءبىرىنشى كەزەڭدە 3-مينۋتتا-اق بريتاندىق ليۋك فەررارا ەسەپ اشىپ، كومانداسىن العا شىعاردى. دەگەنمەن 15-مينۋتتا سان باسىمدىلىعىن پايدالانعان دميتري گرەنتس ەسەپتى تەڭەستىردى.

ەكىنشى كەزەڭدە قازاقستان قۇراماسىنان اۋەلى انتون ساگادەيەۆ 33-مينۋتتا مەرگەندىك تانىتسا، 35-مينۋتتا رومان ستارچەنكو ەسەپتى 3:1 گە جەتكىزدى.

سوڭعى، ءۇشىنشى كەزەڭدە 42-مينۋتتا ر. ستارچەنكو تاعى ءبىر گولدىڭ اۆتورى اتانسا، 46-مينۋتتا نيكيتا ميحايليس كوزگە ءتۇستى. 47-مينۋتتا ءاليحان اسەتوۆ ماتچتىڭ نۇكتەسىن قويدى.

وسىلايشا قازاقستاندىقتار قارسىلاسىن 6:1 ەسەبىمەن ويسىراتا ۇتتى.

ەسكە سالا كەتەيىك، 22- ءساۋىر كۇنى قازاقستان قۇراماسىنىڭ ماجارلاردى 3:0 ەسەبىمەن بەت قاراتپاي ۇتقانىن جازعان بولاتىنبىز. قاتارىنان ەكى مارتە جەڭىسكە جەتكەن قازاقستاندىقتار قوس تۋردان كەيىن 6 ۇپايمەن كوش باستاپ كەلەدى. يتاليا، پولشا، ۆەنگريا جانە ۇلى بريتانيا كوماندالارىنىڭ ءۇش-ۇشتەن ۇپايلارى بار.

ع. مامبەتاليەۆتىڭ شاكىرتتەرى ەندى 25- ءساۋىر كۇنى يتاليا، 27- ساۋىردە سلوۆەنيامەن، 28-ىندە پولشا قۇراماسىمەن كۇش سىناسادى.

بۇل جارىستا ءبىرىنشى جانە ەكىنشى ورىندى يەلەنگەن كوماندالار ەليتالىق ديۆيزيونعا جولداما الادى.