الماتىدا «ماڭگىلىك سارىن» اتتى كۇي كەشى ءوتتى

الماتى. قازاقپارات - بۇگىن الماتى قالالىق مادەنيەت جانە قۇجاتتار باسقارماسىنىڭ ۇيىمداستىرۋىمەن «الاتاۋ» ءداستۇرلى ونەر تەاترىندا «ماڭگىلىك سارىن» اتتى كۇي كەشى ءوتتى، دەپ حابارلايدى قازاقپارات.

ايتا كەتەرلىگى، كۇيدى قاستەرلەيتىن تالعامى جوعارى كورەرمەن ءۇشىن ۇيىمداستىرىلعان كەش تەگىن ءوتتى. بۇل ءبىر جاعىنان جاقىندا عانا بارشا الەۋمەت بولىپ كەڭىنەن تويلاعان ءاز مەرەكە - ناۋرىزعا ارنالعان ءىس- شارالاردىڭ قورىتىندىسى سەكىلدى. ەرەكشە سەرپىن، ءسان- سالتاناتپەن وتكەن كۇي كەشىنە بەلگىلى داۋلەسكەر كۇيشىلەر سەرجان شاكىراتوۆ، ابدۋلحاميت رايىمبەرگەنوۆ، ادىلبەك اتىعايەۆ، ايگۇل ۇلكەنبايەۆا، جانعالي جۇزبايەۆ، مۇقاش تاڭعىت ۇلى، تالعات مۇقىش، مۇرات ءابۋعازى، نۇركەن ءاشىروۆ، باتىرجان مىقتىبايەۆ، ەربولات مۇستافايەۆ، ساۋلە قانيەۆا، اردابي ءماۋلىت ۇلى جانە «سازگەن سازى» ەتنوگرافيالىق - فولكلورلىق ءانسامبلى قاتىستى. كۇي كەشىندە ەل اراسىندا ساقتالىپ، بۇگىنگى كۇنگە جەتكەن بارلىق كۇي مەكتەپتەرىنە ءتان شىعارمالار وينالدى. سونداي- اق، بۇگىنگى تاڭدا ۇمىت بولىپ، قولدانىستان شىعا باستاعان كونەرگەن ساز اسپاپتاردا دا حالىق كۇيلەرى ورىندالدى.

كۇي - حالقىمىزدىڭ ۇلانعايىر مۋزىكالىق قازىناسىنىڭ مول سالاسى، قۇرىلىمى، مازمۇنى، باسقا دا كوپ سيپاتتارى جونىنەن كەمەل دامىپ، بيىك ورەگە جەتكەن جانرلارىنىڭ ءبىرى.