پاۆلوداردا ماسالاردى ۋلاۋ جۇمىستارىنا ۇشاق قاتىستىرىلادى
وڭدەۋ جۇمىستارى اۋەدەن دە جۇزەگە اسىرىلادى، دەپ حابارلايدى pavlodarnews.kz.
مەردىگەرلەردىڭ قاتىسۋىمەن وتكەن جۇمىس وتىرىسىندا وڭدەلەتىن اۋماقتىڭ الاڭى 7215 گەكتاردى قۇرايتىنى انىقتالدى. وعان مويىلدى كەنتىندەگى 25 گەكتار جەر قوسىلادى. قول جەتپەيتىن ورىندار مەن سۋ ايدىندارىنا اۋەدەن وڭدەۋ جاسالادى.
«بيىك قامىستار ءوسىپ كەتكەن، قولايسىز جاعداي تۋدىراتىن ورىندار بار»، - دەدى «ۇلتتىق ساراپتاما ورتالىعى» ديرەكتورىنىڭ ورىنباسارى جۇمانگەلدى وسپانوۆ. «كاۋستيك» ا ق-نىڭ اۋماعىندا ۇلكەن سۋ ايىندارى مەن «قازاقستان اليۋمينيى» ا ق- دا وندىرىستىك سۋ جينالىپ قالعان ۋچاسكەلەر كەزدەسەدى. وسى جەرلەردە دەزينفەكسيا جۇرگىزۋ قيىنعا سوعادى. بىلتىر سول اۋماقتا قانسورعىشتار كوپ بولعان. اتالعان كاسىپورىنداردىڭ وكىلدەرى اكىمدىكتەن حات جولداۋدى ءوتىندى. سونىڭ ناتيجەسىندە مونيتورينگ جاسايتىن توپ زەرتتەۋ جۇرگىزىلەتىن جەرلەرگە ەش كەدەرگىسىز كىرە الادى. «دەزۋس» ج ش س-نىڭ ديرەكتورى امانجول ۋليايەۆتىڭ ايتۋىنشا، ماسالار مەن شىركەيلەردى ۋلاۋ جۇمىستارى 23 -ساۋىردە باستالادى. ول ءۇشىن ءتيىستى اۋا رايى جاعدايى قولايلى بولۋى ءتيىس ءارى عالىمداردىڭ ۇيعارىمى كەرەك.
ەسكە سالا كەتەيىك، وبلىستا اۋماقتى قانسورعىشتاردان وڭدەۋگە 602,3 ميلليون تەڭگە بولىنگەن. بۇل قارجىعا ماسالار مەن شىركەيلەردىڭ دەرناسىلدەرىنە قارسى 199484 بيولوگيالىق پرەپارات، ەرتىس وزەنى مەن 19950 گەكتاردى اۋەدەن وڭدەۋگە، پاۆلودار مەن اقسۋدا 4800 گەكتاردى وڭدەۋگە 4480 ليتر حيميالىق پرەپارات ساتىپ الىنادى.
