حالىقتىڭ ءدىني ساۋاتىن ارتتىرۋ جۇمىستارى بەلسەندى جۇرگىزىلۋى كەرەك - دارحان كالەتايەۆ
مەشىتتى ارالاۋ بارىسىندا مينيستر باس ءمۇفتي سەرىكباي قاجى ورازبەن، مەشىتتىڭ باس يمامى ناۋرىزباي قاجى تاعان ۇلى جانە نايب- ءمۇفتي باۋىرجان ەسماحانمەن كەزدەستى. ءدىني باسقارما باسشىلارى مەشىتتىڭ جۇمىسىمەن جانە ونىڭ ساۋلەت ەرەكشەلىكتەرىمەن تانىستىردى.
دارحان كالەتايەۆ قۇلشىلىق بولمەلەرى مەن وقۋ- اعارتۋشىلىق باعىتتاعى توپتاردىڭ وقۋ زالدارىن، سونداي- اق ق مد ب جانىنداعى «حيكمەت» تەلەاراديو ستۋدياسىنىڭ جۇمىسىمەن تانىستى.
وسىدان كەيىن مينيستر يمامدار جانە دىنباسىلارمەن كەزدەسۋ وتكىزدى. دارحان كالەتايەۆ قوعامداعى رۋحاني قۇندىلىقتاردى دامىتۋ بويىنشا ءتيىمدى اقپاراتتىق- ءتۇسىندىرۋ جۇمىستارىن جۇرگىزۋدىڭ ماڭىزدىلىعىن اتاپ ءوتتى جانە يمامداردى حالىقتىڭ ءدىني ساۋاتتىلىعىن ارتتىرۋ جۇمىستارىنا بەلسەندى قاتىسۋعا شاقىردى.
بۇدان بولەك، ق ر ءدىن ىستەرى جانە ازاماتتىق قوعام ءمينيسترى قازاقستان مۇسىلماندارى ءدىني باسقارماسىنىڭ جاڭا عيماراتىنىڭ قۇرىلىسىمەن تانىستى.
ءمۇفتياتتىڭ اكىمشىلىك عيماراتىنىڭ قۇرىلىسى 2015 -جىلى باستالعان. عيمارات «ازىرەت سۇلتان» مەشىتە قاراما- قارسى ورنالاسقان جانە شامامەن 1,2 گەكتار جەردى الىپ جاتىر. عيماراتتىڭ جالپى اۋدانى 12 مىڭ شارشى مەتردى قۇرايدى، جەكە بولمەلەرى، ءماجىلىس زالى جانە ءدىني قىزمەتكەرلەرگە ارنالعان سپورت كەشەنى بار. ونىڭ اۋماعىندا رۋحاني ادەبيەتتەرمەن جابدىقتالعان كىتاپحانا جانە ءمۇفتيات قىزمەتكەرلەرىنە ارنالعان جاتاقحانا قاراستىرىلعان.
