ساراپشى: قازاقستاننان كوبىنە جىلىجايدا وسىرىلگەن قىزاناقتار مەن قيارلار ەكسپورتتالادى
دەپ حابارلايدى قازاقپارات ءتىلشىسى.
«زاماناۋي وندىرىستىك جىلىجايلاردا ءوسىرىلىپ جاتقان بارلىق اۋىلشارۋاشىلىق جانە كوكونىس ونىمدەرى ەكسپورتقا جىبەرىلۋدە. اسىرەسە، رەسەي جانە تمد ەلدەرىنە جەتكىزەمىز. بۇل ورتاق باعانى انىقتاۋدىڭ ءتيىمدى جولى. ال ەلدىڭ ىشكى نارىعىنىڭ سۇرانىسىنا كەلسەك، ول فەرمەرلىك دالالار مەن جابىق جىلىجايلاردا وسىرىلەتىن كوكونىس ونىمدەرىمەن قاناعاتتاندىرىلىپ وتىر»، - دەيدى قازاقستان جىلىجايلار قاۋىمداستىعىنىڭ پرەزيدەنتى قانات قوشمان.
قوشمان مىرزانىڭ ايتۋىنشا، قازاقستاننىڭ جىلىجاي سەكتورى سوڭعى 10 جىلدا ايتارلىقتاي دامىعان. فەرمەرلەر جابىق جىلىجايلاردى قولدانۋدى ءجون كورەدى. دەسەدە، اۋىل شارۋاشىلىعى سەكتورىنىڭ كوپتەگەن ماماندارى تەمپەراتۋرالىق سەزگىشى بار، جارىقپەن قامتاماسىز ەتىلگەن جوعارى تەحنولوگيالىق وندىرىستىك پارنيكتەردى قاراستىرىپ جاتىر. قازاقستاندىق فەرمەرلەر ءارتۇرلى تەحنولوگيانى پايدالانۋدا. كوبىنە گوللانديانىڭ تاجىريبەسىنە سۇيەنە وتىرىپ، جۇمىس ىستەۋدە.
«بۇگىنگى تاڭدا، ەلىمىزدە مىڭنان استام جىلىجاي جۇمىس ىستەيدى. ونىڭ ىشىندە جابىق جىلىجاي مىڭ گەكتاردى قامتىسا، وندىرىستىك جىلىجايدىڭ اۋماعى - 300 گەكتار. بۇل وسىمدىكتەردى بيوقورعاۋ، حيميالىق قوسپالار مەن تىڭايتقىشتار سىندى وتاندىق سەكتورداعى وزگە دە سالالاردىڭ دامۋىنا نەگىز بولىپ وتىر. ءبىز ەلدىڭ اۋىل شارۋاشىلىق سەكتورىن دامىتۋدا دامىعان ەلدەردىڭ تاجىريبەسىن قولدانىپ كەلەمىز»، - دەيدى ول.
حالىقارالىق كورمەگە رەسەي، يتاليا جانە گوللانديا سىندى ءارتۇرلى ەلدەردەن جۇزدەگەن كومپانيالار كەلىپ، ءوز ونىمدەرىن ۇسىنىپ وتىر. وندىرۋشىلەر موبيلدى تەكشەلەردەن اۋىلشارۋاشىلىق ونىمدەرىن ءتيىمدى تۇردە ءوسىرۋ بويىنشا كەڭەستەرىنە شەيىن ءوز ۇسىنىستارىن جاساپ وتىر.
«گوللانديالىق كومپانيالار جىلىجاي سەكتورى بويىنشا قازاقستاندىق فەرمەرلەرمەن 10 جىلدان بەرى بىرگە ەڭبەك ەتىپ كەلەدى. ازىرگە، ءوزارا ىنتىماقتاستىق جىلىجايلاردى جاساۋ، بيوتىڭايتقىشتاردى جەتكىزۋ مەن گۇل ونىمدەرىن ەكسپورتتاۋ سىندى كوممەرتسيالىق دەڭگەيدەگى كەلىسسوزدەر ەسەبىندە جۇرۋدە. الداعى ۋاقىتتا ۇكىمەت دەڭگەيىندە ىنتىماقتاسۋعا ءۇمىت ارتامىز. قازاقستان نيدەرلاندى كورولدىگى ءۇشىن الدىڭعى شەپتەگى ەلدەردىڭ قاتارىندا»، - دەيدى قازاقستان رەسپۋبليكاسىنداعى نيدەرلاندى كورولدىگى ەلشىسىنىڭ اۋىل شارۋاشىلىق بويىنشا كەڭەسشىسى مەۋۆەس براۋەر.
«جىلىجايلار. كوكونىس. سۋارۋ مەن گۇلدەر» حالىقارالىق كورمەسى الماتىدا 10- رەت وتكىزىلىپ وتىر جانە 21 - ساۋىرگە دەيىن جالعاسادى.
