ۇلتتىق مۋزەيدە ءمۇسىنشى ەركىن مەرگەنوۆتىڭ كورمەسى اشىلدى

استانا. قازاقپارات - قازاقستان رەسپۋبليكاسىنىڭ ۇلتتىق مۋزەيىندە ءمۇسىنشى ەركىن مەرگەنوۆتىڭ «ەركىن مەرگەنوۆ. ۋاقىتتى سەزىنۋ» اتتى كورمەسى اشىلدى، دەپ حابارلايدى قازاقپارات ءتىلشىسى.

كورمەنىڭ اشىلۋىنا «ەركىندىك» قورى مەن ۇلتتىق مۋزەي مۇرىندىق بولىپ وتىر. قازاقستاننىڭ حالىق سۋرەتشىسى ەركىن مەرگەنوۆ 2015 -جىلى ومىردەن ءوتىپ كەتكەنىمەن، ەلىنە وشپەس مۇرا قالدىرعان بىرەگەي ءمۇسىنشى. ەركىن مەرگەنوۆتىڭ كورمەسى ارقىلى ۇلتتىق مۋزەي قازاقستاننىڭ سۋرەتشىلىك ونەرىنە ەرەكشە ۇلەس قوسقان تۇلعالاردىڭ شىعارماشىلىعىن كوپشىلىككە ءتۇسىندىرىپ، تاراتۋعا باعىتتالعان «قازاقستان زاماناۋي ونەر تاريحىنداعى تۇلعالار» اتتى جوباسىن جالعاستىرماق.

«ەركىن تىلەك ۇلىنىڭ ارامىزدان كەتكەنىنە 3 جىلعا تاياپ قالدى. ەڭ ءبىرىنشى كەزەكتە ءمۇسىنشى، سۋرەتشى، ازامات، ادام رەتىندە ەشقاشان شىندىققا كەلگەندە بۇعىپ قالعان ەمەس. ءبىزدىڭ ءبارىمىز وسى ءومىردىڭ بوياۋلى كەلبەتىنە ۇيرەنىپ قالعانبىز. ال ونىڭ شىعارماشىلىعىنا كەلگەندە ادام ءومىردىڭ شىنايىلىعىن ءتۇسىنۋدىڭ كۇردەلى قاتپارلارىمەن بەتپە- بەت كەلەدى. شىندىق پەن وتىرىكتىڭ كۇرەسى ەركىن مەرگەنوۆتىڭ تۋىندىلارىندا ايقىن كورىنەدى. شىندىقتى كوپ ادام قابىلدامايدى. ءبىراق، ودان قۇتىلعان ەشكىم جوق. وسى كورمەدەن كورەرمەندەر ءمۇسىنشى ءاردايىم جەتكىزگىسى كەلگەن شىندىقتى تابار دەگەن ۇمىتتەمىن»، - دەدى كورمەنىڭ بۇگىنگى اشىلۋىندا ونەرتانۋشى كاميللا لي.

ونەر تانۋشىنىڭ ايتۋىنشا، ومىردەن وتەر الدىندا ەركىن مەرگەنوۆتىڭ ماسكەۋدەگى سۋرەتشىلەردىڭ ورتالىق ۇيىندە جانە الماتىداعى ءا. قاستەيەۆ اتىنداعى ق ر مەملەكەتتىك ونەر مۋزەيىندە ەكى كورمەسى وتكەن. كۇندەرىنىڭ ساناۋلى قالعانىن سەزگەندەي، سۋرەتشى ول كورمەلەردىڭ ەكەۋىن دە «قوشتاسۋ» دەپ اتاپ كەتىپتى. استاناداعى «ەركىن مەرگەنوۆ. ۋاقىتتى سەزىنۋ» كورمەسىنىڭ وتۋىنە سۋرەتشىنىڭ مۇراگەرى ءارى شاكىرتى الىبەك مەرگەنوۆ مۇرىندىق بولعانىن دا ايتا كەتۋ كەرەك.

ەركىن مەرگەنوۆتىڭ شىعارماشىلىعى - ورتالىق ازيانىڭ ونەر كەڭىستىگىندەگى بىرەگەي قۇبىلىس. ونىڭ مۇسىندەرى جاھاندىق تاريحي وزگەرىستەر ءداۋىرىنىڭ كوركەم سيمۆولدارى سانالادى. ول ۇلتتىق كوركەم ءداستۇردىڭ ەستەتيكالىق جانە كوركەم قاعيدالارىن زەردەلەي كەلە ولاردىڭ تىڭ راكۋرستارىن، نازىك تە ماعىنالى يدەيالارىن اشادى. مەرگەنوۆ قازاقى ويۋدىڭ سارىندارىنان ءمۇسىن كولەمىنىڭ نازىك بەينەلىلىگىن ءبىرىنشى بولىپ كورە بىلگەن تۇلعا.

ءمۇسىنشىنىڭ تۋىندىلارى ق ر ۇلتتىق مۋزەيىنىڭ، ءا. قاستەيەۆ اتىنداعى ق ر مەملەكەتتىك ونەر مۋزەيىنىڭ، مەملەكەتتىك ترەتياكوۆ گالەرەياسىنىڭ، ۋكرايناداعى ورىس ونەرى مەملەكەتتىك مۋزەيىنىڭ، قىرعىز مەملەكەتتىك ونەر مۋزەيىنىڭ توپتامالارىندا، سول سەكىلدى الىس جانە جاقىن شەتەلدەردىڭ جەكە كوللەكسيالارىندا ساقتاۋلى.

كورمە وسى جىلدىڭ 23 - شىلدەسىنە دەيىن جالعاسادى.