شىعىس قازاقستاننىڭ وزەن- كولدەرىندە بالىق اۋلاۋعا تىيىم سالىندى

وسكەمەن. قازاقپارات - ۋىلدىرىق شاشۋ ماۋسىمى باستالعاندىقتان، شىعىس قازاقستاننىڭ سۋ قويمالارىندا بالىق اۋلاۋعا تىيىم سالىندى، دەپ حابارلايدى قازاقپارات ءتىلشىسى.

 بۇل شەكتەۋ ءار سۋ قويماسىندا ءارتۇرلى مەرزىمگە بەلگىلەنگەن. ويتكەنى، جەرگىلىكتى اۋماقتىڭ كليماتى مەن سۋ باسسەيندەرىنىڭ قاسيەتى ءارتۇرلى.

«ۋىلدىرىق شاشۋ كەزەڭىندە بالىق اۋلاعا تىيىم سالۋ شارالارىن رەتتەيتىن ارنايى بۇيرىق بار. سوعان سايكەس، قاراتال، اقسۋ، لەپسى، اياگوز وزەندەرىندە 15 ساۋىردەن 1 ماۋسىمعا دەيىن بالىق اۋلاۋعا تىيىم سالىنادى» - دەيدى وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ مامانى اقەركە تۇرسىنحانوۆا.

ماماننىڭ سوزىنشە، الاكول، ساسىقكول، قوشقاركول كولدەرىندە جانە ساعالارى مەن شىعاناقتارىندا، ءۇرجار، بەسقوپا، ىرعايتى، تەرەكتى، تەنتەك، قاتىنسۋ، ەمەل، ۇيالى، قاراكول، جىڭىشكەسۋ، شىنجىلى وزەندەرىندە 10 - ساۋىردەن 1 - ماۋسىمدى قوسا العانداعى ارالىقتا بالىق اۋلاۋعا بولمايدى.

ەرتىس باسسەينىنە جاتاتىن سۋ كوزدەرىندە ۋىلدىرىق ءسال كەشىگىپ شاشىلعانىمەن تىيىم مەرزىمى ەكى كۇنگە قىسقا. زايسان كولىندە جانە بۇقتىرما سۋ قويماسىنىڭ قاراقاستان باتين شوقىسىنا دەيىنگى بولىگىندە 16 - ساۋىردەن 30 - مامىردى قوسا العانداعى ارالىقتا قارماق سالىپ، اۋ قۇرۋعا شەكتەۋ قويىلعان. ال باتين شوقىسىنان بۇقتىرما سەس- نە دەيىنگى بولىگىندە 1 - مامىردان 15- ماۋسىمدى قوسا العانداعى ارالىقتا بالىق اۋلاۋعا بولمايدى. ەرتىس وزەنىنىڭ وزىندە وسكەمەننەن باستاپ پاۆلودار وبلىسىنىڭ اكىمشىلىك شەكاراسىنا دەيىن 10 - مامىردان 10 - ماۋسىمدى ارالىعىندا بالىق اۋلاۋعا تىيىم ەنگىزىلگەن.

«ۋىلدىرىق شاشۋ مەرزىمىنىڭ باستالۋىنا وراي قۇقىق قورعاۋ ورىندارى جەر- جەرلەردە ارنايى رەيد وتكىزە باستاعان بولاتىن. رەيد بارىسىندا 49 ادام بالىق اۋلاۋ ەرەجەسىن بۇزعانى انىقتالعان. مىسالى، تارباعاتاي اۋدانىنىڭ تۇعىل اۋىلىندا 3 ادام زايسان كولىنە قايتادان جاسالعان اۋ قۇرعان جەرىنەن ۇستالدى» - دەيدى وبلىستىق ىشكى ىستەر دەپارتامەنتىنىڭ باسپا ءسوز قىزمەتشىسى ازامات رايسوۆ.

اۆتور: ەسىمجان ناقتىباي