بايلار دا بالا سەكىلدى
العاشقى توپ ۇزدىكسىز وي ۇستىندە جۇرەدى. ۋاقىتتىڭ قادىرىن بىلەتىندەر دە سولار. بوس ۋاقىتىن دەنەشىنىقتىرۋ مەن سۇيىكتى ىسىنە عانا ارنايتىن كەيبىر قالتالىلار قانداي حوببيمەن اينالىسادى؟ ماسەلەن...
دجون د. روكفەللەر جاسى ۇلعايسا دا گولف ويناۋدى تاستاعان ەمەس. ءوز قارجىسىنا اشقان ويىن الاڭدارىندا ساعاتتاپ جۇرەدى. ءتىپتى قار جاۋسا الاڭدى لەزدە تازارتىپ، بىرگە جۇرگەن ارىپتەستەرىنە جىلى كيىمدەر تاراتىپ، ويىن اياقتالعانشا دالا كەزەدى.
ميللياردەردىڭ ەكىنشى ءبىر سۇيىكتى ءىسى - كوشەت وتىرعىزۋ. ءبىر كەزدەرى ءوزى وتىرعىزعان اعاشتاردىڭ بيىكتىگى قازىر 30 مەترگە دەيىن جەتەدى ەكەن. ونىڭ ارناۋلى بريگاداسى ءبىر وتىرعىزعاندا 10000 داناعا دەيىن كوشەت ەگەدى. ابدەن تولىسقاندارىن دەر كەزىندە ساتىپ، قالتاسىن قاراجاتپەن تولىقتىرىپ وتىراتىن ادەتى دە بار.
ال روكفەللەردىڭ دوسى دەۆيد قوڭىزداردان كوللەكتسيا جينايدى. بۇل دا ءبىر قىزىق دۇنيە...
«مايكروسوفت» كومپانياسىنىڭ باسشىسى بيلل گەيتس بايلاردىڭ كوشىن بەرمەي كەلە جاتقانداردىڭ ءبىرى دە بىرەگەيى. ول كومپيۋتەر بيزنەسمەن اينالىساتىن ارىپتەستەرىنىڭ ءبىرى ەنن ۆينبلادتىڭ فيزيكا تۋرالى كىتاپتارى مەن ريچارد فەينماننىڭ لەكسيالارىن وقىعاندى ۇناتادى.
گەيتستىڭ تاعى ءبىر قىزىعاتىن نارسەسى - جىل سايىن كاۋاپ ءپىسىرۋ ناۋقانىن ۇيىمداستىرىپ، سول دۋماندا ءتۇرلى باسەكەلەر ۇيىمداستىرۋ. وعان قاتىسۋشىلار ءوزارا ويىندار ويناپ، گەيتستىڭ قولىنان ۇمىتىلماس سىيلىقتار الادى.
ءبىر قىزىعى، بيلل وڭاي شاعىلاتىن جاڭعاق ەمەس كورىنەدى. ويتكەنى جارىستارعا ءوزى دە بەلسەنە ارالاسىپ، ۇنەمى جەڭىمپاز اتانادى. بىردە ول التى توننا قۇم ءتۇسىرتىپ، ودان ءۇي تۇرعىزۋعا كونكۋرس جاريالايدى. ەڭ سوڭىندا ءوزى جەڭىمپاز بولىپ شىعادى.
جۇرتتىڭ ايتۋىنشا، سوڭعى جىلدارى گەيتستىڭ اينالاسىنداعىلار اۋىسا باستاعان. سوعان بايلانىستى بولار، قالتالى قاھارمان دا تەڭىز تەرەڭىنەن بالىق اۋلاۋ، كولىك جارىستارىنا قاتىساتىن بولىپتى.
تاعى ءبىر ميللياردەر - امەريكالىق ونەركاسىپشى جان پول گەتتي ونەر تۋىندىلارىنان كوللەكتسيا جينايدى. بۇل ەرەكشە ءبىر جاڭالىق ەمەس، دەگەنمەن بوس ۋاقىتىن ءتيىمدى ءبىر نارسەگە ارناۋى وزگەلەرگە ۇلگى بولارلىق. ول مۋزەيلەر مەن كونە زاتتار ساتاتىن دۇكەندەردى، ەكسپوناتتار زەرتتەۋمەن اپتالاپ اينالىسادى. جالىعۋدى، زەرىگۋدى بىلمەيدى.
بريتاندىق كاسىپكەر، Virgin كورپوراتسياسىنىڭ نەگىزىن قالاۋشى ريچارد برەنسون ەكستريم سپورتتى ۇناتادى. ءتىپتى ولىمنەن دە قورقپايدى. ماسەلەن، ول لا- مانشتى نەمەسە اۋە شارىمەن تىنىق مۇحيتىن دا كەسىپ وتە الادى. وسىنداي كوزسىز ەرلىگىنىڭ ارقاسىندا «گيننەستىڭ رەكوردتار كىتابىنا» بىرنەشە رەت ەنگەن.
كلەممي دايكسون سپەنگلەر - Bank of America نىڭ ءىرى اكسيونەرى. جۇرگەن جەرىندە كونە ساعاتتار جينايدى. قىزىعۋشىلىق وسىدان 45 جىل بۇرىن باستالىپتى. كلەممي اناسى سىيلاعان - XVII عاسىردىڭ ولجاسى سانالاتىن كونە ساعات كەنەتتەن توقتاپ قالعان سوڭ ونى جوندەۋگە كىرىسەدى. دەگەنىنە جەتكەن ول ساعات جوندەيتىن شەبەرحانا اشۋدى ءجون سانايدى.
قالتالى ازامات فيل انشۋتس كۇن سايىن تاڭعى ساعات بەس جارىمدا تۇرىپ 10 ميل جەر جۇگىرمەسە، ىشكەن اسى سىڭبەيدى. گەري مەيگنەس جۇك كولىگىن جولسىز جەرمەن ساعاتتاپ جۇرگىزگەندى ۇناتادى.
ماڭدايى جارقىراعان ماگنات، فۋتبول كلۋبىنىڭ يەسى دجەيمس ايرسي مۋزىكا اسپاپتارىن جينايدى. ونىڭ جەكە قورىندا وتە باعالى گيتارالار بار. دجوردج حارريسون جانە دجەرري گارسيا سەكىلدى اتاقتى مۋزىكانتتاردىڭ قولى تيگەن اسپاپتار ءالى كۇنگە ساقتاۋلى. كەزىندە سولاردى ساتىپ الۋعا قىرۋار قاراجات جۇمساعانىنا دا وكىنبەيدى.
كوپتەگەن ميلليونەرلەر شىعارماشىلىقپەن اينالىسادى. مىسالى، مۇناي ماگناتى گارولد لافايەت حانت ۋتوپيالىق «الپاكا» دەپ اتالاتىن اۆتوبيوگرافيالىق رومان جازعان. ال ينۆەستور گوردون گەتتي، جانا پولدىڭ ۇلى گەتتي مۇناي بيزنەسىن تاستاپ وپەرا جازۋمەن شۇعىلدانىپ كەتكەن. ول ءوز شىعارماسىنىڭ ءبىرىن ايگىلى شەكسپير شىعارمالارىنداعى كەيىپكەرلەردىڭ ءبىرىنىڭ اتىمەن «فالستاف» دەپ اتاعان. كەزىندە وپەرانىڭ قويىلىمىنا رەسەي ۇلتتىق وركەسترى قاتىسىپتى.
زەرتتەۋشى فريدسوننىڭ سوزىنە قاراعاندا، شىن مانىندە باي ادام بولعىڭىز كەلسە، ومىردە بار بايلارعا ەلىكتەۋ كەرەك ەكەن. ادام ءوزىن ءوزى دامىتۋدى، ءار كۇنىنە قۋانا ءبىلۋدى، جاڭا ىستەر ۇمتىلۋدى، جەتىستىككە جەتۋدى ۇيرەنۋى ءتيىس. حوببي ەشكىمگە موشەكتەپ اقشا اكەلمەيدى. ەسەسىنە جانىڭىز باييدى، جان- جاعىڭىزعا جاڭاشا قارايسىز، ۋاقىت ولشەمىن بىلەسىز، باقىتتى عۇمىر كەشۋگە ۇمتىلاسىز، وزگەلەرگە ونەگە كورسەتەسىز.
جولداسبەك دۋاناباي
«ايقىن»
