سەرىكبول سايلاۋبەك: م س سايلاۋبەكپەن شاتاستىرعان اجەي «اراعىڭدى قويىپ، تولىپ قالىپسىڭ» دەپ ماقتاپ تۇر

استانا. قازاقپارات - اۋىل-اۋىلدى ارالاپ، تەگىن كونسەرت قويعان سەرىكبول سايلاۋبەكتى اۋىلداعى ءبىر اجە مس سايلاۋبەكپەن شاتاستىرعان.

وتكەن جىلى ەل ارالاپ، 125 تەگىن كونسەرت بەرگەن ءانشى سەرىكبول سايلاۋبەك ەۋرازيا ءبىرىنشى ارناسىنداعى «قايىرلى تاڭ» باعدارلاماسىنىڭ ستۋدياسىندا اۋىلداردىڭ بىرىندە بولعان قىزىقتى جايتتى ايتىپ بەردى.

حالىقتىڭ باتاسىن جيناپ، اللا تاعالانىڭ رازىلىعى ءۇشىن اۋىل-اۋىلدى ارالاپ، تەگىن كونسەرت قويعان ونەر يەسى حالىققا ءان تىڭداتىپ، رۋحاني اڭگىمەلەسىپ، كوڭىلدەرىن كوتەرۋدى ماقسات ەتىپتى. اپپاراتۋرا، ساحنا تاڭدامايتىن ءانشى مادەنيەت ءۇيى جوق اۋىلداردا كامازدىڭ، اربانىڭ ۇستىنە كىلەمدى جايىپ جىبەرىپ، ءان ايتاتىن كەزدەرىن كۇلىپ ەسكە ءتۇسىردى.

سونداي كونسەرتتەردىڭ بىرىندە اۋىلداعى ءبىر اجەي «مالادەس سايلاۋبەگىم-اي! اراعىڭدى قويىپ، ساقالىڭدى ءوسىرىپ، تولىعىپ قاپسىڭ، مالادەس» دەپ ريزاشىلىعىن ءبىلدىرىپتى. ءوزىن م س سايلاۋبەكپەن شاتاستىرعان اجەيدى ءانشى «اپا، مەن ىشپەيمىن، مەن باسقا سايلاۋبەكپىن، سەرىكبولمىن» دەپ ارەڭ سەندىرىپتى.