موڭعوليا شەنەۋنىكتەرى وففشورداعى بايلىقتارىنان باس تارتىپ جاتىر
موڭعوليانىڭ سىبايلاس جەمقورلىققا قارسى كۇرەس جونىندەگى زاڭى وسىعان مىندەتتەگەن ەدى. موڭعوليا ازاماتتارى وففشورلىق ايماقتا اشىلعان بانك شوتتارىن جابۋ، بانكتە ساقتالعان قاراجاتتارىنان باس تارتۋ، جىلجىمالى جانە جىلجىمايتىن مۇلىكتىڭ مەنشىكتىك قۇقىعىن ساتۋ، بەرۋ، ۇلەس قوسۋ ارقىلى قۇرىلعان زاڭدى تۇلعانىڭ قىزمەتىن توقتاتۋ، ءوز قۇقىقتارىن ساتۋ نەمەسە اۋدارۋ، يەلىكتەن شىعارۋ بويىنشا اقپاراتتى 2018-جىلدىڭ 6- ساۋىرىنە دەيىن مالىمدەۋ كەرەك ەدى. وسى ۋاقىت ىشىندە پارلامەنتتىڭ 2 مۇشەسى، موڭعولبانكىنىڭ 1 لاۋازىم يەسى وزدەرىنىڭ قاتىسى بار تۇلعاعا تيەسىلى وففشورلىق ايماقتا تىركەۋلى كومپانياسىنىڭ اكسيالارىن 2015-2017-جىلدارى باسقا تۇلعالارعا اۋدارعانى جايلى حابارلادى.
سونىمەن قاتار، پوليتسيا باس باسقارماسىنا ەنشىلەس ۇيىمنىڭ 1 باسقارما مۇشەسى ءوز يەلىگىندەگى 3 شوتتىڭ جابىلعانىن تىركەتتى. بۇدان باسقا وففشورلىق ايماققا جاتاتىن سىرت ەلدەردە رەسمي فۋنكسيالاردى جۇزەگە اسىرۋ، ءبىلىم الۋ، مەديتسينالىق كومەك جانە قىزمەت كورسەتۋ ماقساتىندا بانكتەرگە ەسەپشوت اشقان، قاراجات ساقتاعان، جىلجىمالى جانە جىلجىمايتىن مۇلىك يەلەنگەن 16 لاۋازىمدى تۇلعا سىبايلاس جەمقورلىققا قارسى اگەنتتىككە جازباشا تۇردە حابارلاما جولدادى.
ەسكە سالا كەتەيىك، موڭعوليا پرەزيدەنتى حالتمااگيين باتتۋلگا سايلاۋالدى باعدارلاماسىندا وففشور ايماقتاعى جاسىرىن قاراجاتتاردى ەلگە قايتارىپ اكەلۋگە اتسالىسۋعا ۋادە بەرگەن بولاتىن.
