نازاربايەۆتىڭ سىنىنا «استانا بانكى» جاۋاپ بەردى
«بارلىق جۇمىستاردى ورىنداماعان، كەيىننەن مەملەكەتتىك قولداۋعا يە بولاتىن بانكتەر ەشقانداي ناتيجە بەرمەيتىن بولادى. سوندىقتان بارشاڭىزعا ۇلتتىق بانككە قىسىم كورسەتۋدى توقتاتۋعا كەڭەس بەرەمىن. قازىرگى ۋاقىتتا «Qazaq Banki»، «ەكسيمبانك» جانە «استانا بانكى» ناشار كورسەتكىشتەرگە يە.
سەبەبى، بۇل بانكتەردىڭ اكسيونەرلەرى جۇمىستى دۇرىس باسقارماي، سالىمشىلاردان العان اقشانى قايتارىپ بەرۋگە شامالارى كەلمەي، ولارعا جاۋاپ بەرە الماي وتىر. ولار قالاي جۇمىس ىستەي الادى؟ ەگەر ولار وسى بانكتەردى ساقتاپ قالعىلارى كەلسە، اكسيونەرلەر ەڭ دۇرىس ەمەس جولمەن العان قاراجاتتى قايتارىپ، ورنىنا قويسىن»، - دەدى پرەزيدەنت.
بۇدان كەيىن «استانا بانكى» باسشىلىعى وزدەرىنىڭ Facebook پاراقشاسىندا بانك كليەنتتەرىنە ءوتىنىش جاسادى.
«بۇگىنگى تاڭدا «استانا بانكى» ا ق قازاقستان رەسپۋبليكاسى ۇلتتىق بانكىنىڭ بارلىق پرۋدەنسيالدىق نورماتيۆتەرىن ورىنداپ وتىر. «استانا بانكى» قۇرىلعالى بەرى ءوز مىندەتتەرىن ورىنداۋ بويىنشا ەشقاشان دەفولتقا جول بەرگەن ەمەس»، - دەلىنگەن حابارلامادا.
سونداي-اق، بانك مەملەكەتتىك قولداۋ باعدارلامالارىن الۋشىلار ەمەس ەكەنىن جانە كليەنتتەر ءۇشىن بارلىق مىندەتتەمەلەردى ورىنداۋعا نيەتتى ەكەنىن اتاپ ءوتتى.
جينالىس بارىسىندا نۇرسۇلتان نازاربايەۆ ۇلتتىق بانكتىڭ بانكتەردى ساۋىقتىرۋ باعدارلاماسى جابىلاتىندىعىن مالىمدەدى. سونداي-اق، زارداپ شەككەن بانكتەردىڭ اكسيونەرلەرى بانكتەرىن ساقتاۋ ءۇشىن ءوزىنىڭ قارجى رەسۋرستارىن ينۆەستيتسيالاۋى كەرەك ەكەنى ايتىلدى. ول سونىمەن قاتار، وسى بانكتەردىڭ اكسيونەرلەرىنە ۇلتتىق بانككە قىسىم كورسەتۋلەرىن توقتاتۋدى تالاپ ەتتى.
دەرەككوز: Stan.kz
