استانادا قازاقتىڭ ايگىلى باتىر قىزىنا ەسكەرتكىش ورناتىلماق
بۇل تۋرالى ب ق و مادەنيەت، ارحيۆتەر جانە قۇجاتتاما باسقارماسىنىڭ باسشىسى قادىربولات مۇساعاليەۆ زيالى قاۋىم وكىلدەرىمەن كەزدەسۋدە ءمالىم ەتتى، دەپ حابارلايدى قازاقپارات ءتىلشىسى.
ونىڭ ايتۋىنشا، استاناداعى جەڭىس داڭعىلى بويىنداعى تىنىمباقتا (سكۆەر) باتىر قىزدىڭ ەڭسەلى ەسكەرتكىشى بوي كوتەرمەك.
ەسكەرتكىشتىڭ بيىكتىگى تۇعىرىمەن قوسا ەسەپتەگەندە 6,1 مەتر بولماق. وندا شينەل كيىپ تۇرعان باتىر قىز بەينەلەنگەن. اۆتورى - بەلگىلى قازاقستاندىق ءمۇسىنشى مۇرات مانسۇروۆ. ەسكەرتكىشتى بيىل جازدا استانا كۇنىنە وراي اشۋ كوزدەلۋدە.
باتىس قازاقستاندىقتار ەلورداعا سىيعا تارتاتىن تىنىمباقتا اباتتاندىرۋ جۇمىستارى دا جاسالادى.
ەسكەرتكىش جوباسىنا قاتىستى زيالى قاۋىم وكىلدەرى تاراپىنان ۇسىنىس- پىكىرلەر ايتىلدى. ق. مۇساعاليەۆ مۇنىڭ بارىنشا ەسكەرىلەتىنىن جەتكىزدى.
ورال قالاسىنداعى م. مامەتوۆا اتىنداعى مەموريالدىق مۋزەي-ءۇيىنىڭ ديرەكتورى سۆەتلانا بەكتەنوۆانىڭ سوزىنە قاراعاندا، باتىر قىزدىڭ بەت-الپەتى ونىڭ سالىنعان ەمەس، تۇسىرىلگەن ءتۇپنۇسقا سۋرەتىنە كەلەدى.
مۇسىندەردى ەسەپتەمەگەندە، بۇل وسىمەن مانشۇكتىڭ بەسىنشى ەسكەرتكىشى بولماق. ونىڭ العاشقىسى نەۆەل قالاسىندا 1979 -جىلى اشىلدى. 1988 -جىلى ورال قالاسىندا بوي كوتەرگەن ەسكەرتكىش وتكەن جىلى تۋعان جەرى - بوكەي ورداسى اۋدانى ورتالىعى سايقىنعا كوشىرىلدى. ورنىنا قازاقتىڭ ءۇش باتىر قىزى مانشۇك، ءاليا، حيۋازعا ەسكەرتكىش ورناتىلدى. سونداي-اق 1995 -جىلى الماتىدا مانشۇك پەن ءالياعا ەسكەرتكىش سالىنعانى بەلگىلى.
ايتا كەتەيىك، ورال قالاسىندا يساتاي- ماحامبەت ەسكەرتكىشىن ورناتۋ جوسپارلانۋدا.
