اسانالى ءاشىموۆ: ديماش - الەمدىك ونەر قايراتكەرى

اقتوبە. قازاقپارات - اقتوبەدە «ۇلتتىق ونەر - رۋحاني بولمىس» اتتى كەزدەسۋ ءوتتى.

ق ر حالىق ءارتىسى، اكتەر اسانالى ءاشىموۆ ءانشى ديماش قۇدايبەرگەن تۋرالى ويىن ايتتى، دەپ حابارلايدى قازاقپارات ءتىلشىسى.

اقتوبە قالاسىنا اكتەر ءاسانالى ءاشىموۆ، ءانشى-كومپوزيتور التىنبەك قورازبايەۆ جانە ق ر ەڭبەك سىڭىرگەن قايراتكەرى، ءداستۇرلى ءانشى تاتيانا بۋرميستروۆا كەلىپ، كەزدەسۋ ءوتتى. ەلباسى نۇرسۇلتان نازاربايەۆتىڭ «رۋحاني جاڭعىرۋ» باعدارلاماسى اياسىندا وتكەن كەزدەسۋ كەزىندە احمەت، عازيزا جۇبانوۆتار، اقتوبەنىڭ تۋماسى ديماش قۇدايبەرگەن تۋرالى ايتىلدى.

«ديماش - الەمدىك ونەر قايراتكەرى. ونىڭ ماسشتابى ءبىزدىڭ قازاقستانعا سىيمايدى. ول 2 ميلليارد حالقى بار قىتايعا باردى. مەن ونى بۇكىل الەمدىك بولدى دەپ قابىلدايمىن. قازاقستاندا جۇرسە جىلىنا ءبىر كونسەرت بەرەر. ول اندا-ساندا كەلىپ، ەسەپ بەرىپ تۇرسا دا جەتكىلىكتى. ال بۇكىل الەمگە قازاقتى تانىستىرىپ جۇرسە قۋانامىز، سول ءبىزدىڭ ماقتانىشىمىز. ءوزى ادەمى بالا. بىرنەشە رەت ۇستەل باسىندا كەزدەستىك. ايمان مۇساقوجايەۆانىڭ قاراماعىنداعى ديماشپەن امەريكانىڭ لوس-اندجەلەس قالاسىندا كەزدەستىك. وتە قاراپايىم بالا. مەن تاڭقالامىن. بىزدە حالىقتىڭ الدىندا ءبىر-ەكى رەت كورىنىپ، ساحنادا بوقتايدى، بەرەكەسىن كەتىرەدى. ءوزىن ۇستاي الماي قالاتىندار كوپ. نە ءىشىپ كەتەدى، نە قۇسىپ كەتەدى، جوق بولادى. ۇستازىم شاكەن ايتاتىن، «ونەردە مەنەن دە مىقتى بولعان، مەنەن دە مىقتى بولادى» دەپ. ادامنىڭ ارتىندا مىقتى قورعاسىن بولۋى كەرەك. ول ادامنىڭ داندايسىماۋى ءۇشىن. داندايسۋ - ونەر ادامىنىڭ جاۋى»، - دەدى اسانالى ءاشىموۆ.