اتىراۋدا باتا بەرۋ بايقاۋى ءوتتى
ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا اتىراۋ وبلىسىنىڭ اكىمدىگى، وبلىستىق مادەنيەت، ارحيۆتەر جانە قۇجاتتاما باسقارماسى، «ارداگەرلەر ۇيىمى» رەسپۋبليكالىق قوعامىنىڭ وبلىستىق فيليالى، وبلىستىق تاريحي- ولكەتانۋ مۋزەيى ۇيىمداستىردى.
جىل سايىن ءداستۇرلى تۇردە وتەتىن بايقاۋعا باتىس قازاقستان، اقتوبە، ماڭعىستاۋ جانە اتىراۋ وبلىستارىندا وتكەن ىرىكتەۋ سايىستارىندا جۇلدەلى ورىندارعا يە بولعان 21 ۇمىتكەر باق سىناستى.
بايقاۋعا قاتىسقان سايىسكەرلەر «ەل ەسىندەگى باتالار» تاقىرىبىندا تاريحتا ەسىمى ساقتالعان تۇلعالاردىڭ باتالارىن ناقىشىنا كەلتىرە ورىندادى. ال سايىستىڭ ەكىنشى بولىمىندە قاتىسۋشىلار ۇلتتىق سالت- داستۇرلەردىڭ بىرەۋىنە ءوزىنىڭ باتاسىن بەردى.
بايقاۋعا قاتىسۋشىلارعا تاريح عىلىمدارىنىڭ دوكتورى، پروفەسسور، «ارداگەرلەر ۇيىمى» رەسپۋبليكالىق قوعامدىق بىرلەستىگى ءتوراعاسىنىڭ ءبىرىنشى ورىنباسارى ءومىرزاق وزعانبايەۆ باستاعان قازىلار القاسىنىڭ قۇرامى قازىلىق ەتتى.
شارا بارىسىندا سايىسقا ءتۇسۋشى ارداگەرلەرىمىزگە اق جول تىلەۋ ءۇشىن ارنايى دايىندالعان «باتامەنەن ەل كوگەرەر» كىتابىنىڭ تۇساۋى كەسىلدى.
اتالعان كىتاپتا تولە، قازىبەك، ايتەكە بيلەرىمىز بەن ءسوز مارجانىن ميراس تۇتقان اقساقالدارىمىزدىڭ اق باتالارىمەن قاتار اتىراۋ وبلىسىندا 2017 -جىلى وتكىزىلگەن جانە وسى سايىسقا قاتىسۋشى باتاگوي اتالارىمىزدىڭ باتالارى توپتاستىرىلعان.
بايقاۋ قورىتىندىسى بويىنشا باس جۇلدەگە باتىس قازاقستان وبلىسى، قاراتوبە اۋدانىنىڭ ارداگەرى ەرتاي سەردالين يە بولدى. ال، ءبىرىنشى ورىندى اتىراۋ وبلىسى، يساتاي اۋدانىنىڭ ارداگەرى ۋاحيت ءادىلوۆ، ەكىنشى ورىندى يندەر اۋدانىنىڭ ارداگەرى مولداباي بەرعاليەۆ پەن قۇرمانعازى اۋدانىنىڭ ارداگەرى سابىروۆ عالىمجان، ءۇشىنشى ورىندى ماڭعىستاۋ وبلىسى، جاڭاوزەن قالاسىنىڭ ارداگەرى تاعان قۇماشيەۆ، اقتوبە وبلىسىنىڭ ارداگەرى مارات قابيجانوۆ جانە اتىراۋ قالاسىنىڭ ارداگەرى اقمىرزا باتىرقايىروۆتارعا بۇيىردى.
اباي اقمۇرزيەۆ
