اسانالى ءاشىموۆ قازاق كينوسى تۋرالى: داڭقتى فيلمدەر شىقپاي جاتىر

اقتوبە. قازاقپارات - اقتوبەلىكتەرمەن كەزدەسكەن ق ر حالىق ءارتىسى اسانالى ءاشىموۆ قازىرگى قازاق كينوسى تۋرالى ويىن ايتتى، دەپ حابارلايدى قازاقپارات ءتىلشىسى.

«كينو، تەاتر، ادەبيەتتەگى بارلىق شەديەۆر كەڭەس ۇكىمەتى زامانىندا تۋعان. ول داۋىردە شاكەن ايمانوۆ، سۇلتان قوجىقوۆ، ءماجيت بەگالين، ابدۋللا قارساقبايەۆ سياقتى ۇلكەن شەبەرلەر ءومىر ءسۇردى. ورتامىزدان كەتتى، جاستار كەلدى. زامان، تالعام وزگەرەدى. ءقازىر سەريالدار بار. بۇرىن «قىز جىبەكتى» 2-2,5  جىل تۇسىرسەك، قازىر 12 سەريالى فيلمدى ءۇش ايدا تۇسىرەدى. ونەرگە ۋاقىت، قارجى كەرەك. سوندا ول جاقسى شىعادى. «قىز جىبەكتى» 1 ميلليون اقشاعا ءتۇسىرىلدى. جەتپەي، تاعى مەملەكەتتەن سۇرادى. ءساتتى شىقتى. قارجىسى جاقسى بولدى، دايىندىق مىقتى ەدى. قازىر قارجى دا، تالانت تا تاپشىلاۋ. كينونى كينورەجيسسەر ءتۇسىرۋى ءتيىس. كادر جەتىسپەي جاتىر. بار بولعانى 2-3 ءتاۋىر رەجيسسەرىمىزدىڭ دەڭگەيى ورتا، ورتادان جوعارى بولىپ تۇر. ۇلكەن، داڭقتى فيلمدەر شىقپاي جاتىر. ءبىز وپتيميست ادامدارمىز. كەلەشەككە ۇمىتپەن قارايمىز»، - دەدى اسانالى ءاشىموۆ «ۇلتتىق ونەر -رۋحاني بولمىس» اتتى كەزدەسۋدە.

بۇعان دەيىن حابارلاعانىمىزداي، اسانالى ءاشىموۆ ديماش تۋرالى ويىن ايتىپ، وعان الەم تانىعان ونەر قايراتكەرى دەپ باعا بەرگەن بولاتىن.

اۆتور: التىناي ساعىندىقوۆا