20:12, 18 - ءساۋىر 2018 | GMT +5
وزبەكستان مەن تاجىكستان ورتاق شەكارانى مينادان تازارتاتىن بىرلەسكەن توپ قۇردى
استانا. قازاقپارات - وزبەكستان مەن تاجىكستان ەكى مەملەكەتتىڭ شەكاراسىنىڭ مينالانعان ۋچاسكەلەرىن تازارتۋ ماقساتىندا بىرلەسكەن توپ قۇردى، دەپ حابارلايدى «Kabar» اگەنتتىگى.
تاجىك بيلىگىنىڭ مالىمەتتەرىنە سۇيەنسەك، ەكى مەملەكەتتىڭ ورتاق شەكارالارىن مينادان تازارتۋ جۇمىستارى 2018-جىلعى مامىردىڭ ورتالارىنا جوسپارلانعان.
تاجىكستاننىڭ مينا ماسەلەلەرى جونىندەگى ۇلتتىق ورتالىعىنىڭ ديرەكتورى مۋحاببات يبراحيمزادا بىرلەسكەن توپتىڭ مينا قويىلعان جەرلەردى تازارتۋعا دايىندالىپ جاتقانىن جەتكىزدى.
ەسكە سالا كەتەيىك، وزبەكستان پرەزيدەنتى شاۆكات ميرزيەيەۆتىڭ تاجىكستانعا العاشقى رەسمي ساپارى كەزىندە ەكى مەملەكەتتىڭ باسشىلارى 2019-جىلعا قاراي ورتاق شەكارانى مينادان تازارتۋ جۇمىستارىن اياقتاۋعا كەلىسكەن بولاتىن.
تاجىكستاننىڭ مينا ماسەلەلەرى جونىندەگى ۇلتتىق ورتالىعىنىڭ مالىمەتتەرىنە قاراعاندا، سوڭعى جيىرما جىلدا مينا جارىلىسىنان 800 ادام زارداپ شەككەن.
