استانانىڭ بازارلارى تولىعىمەن قايتا قۇرىلادى

استانا. قازاقپارات - «ساۋدا قىزمەتى تۋرالى» زاڭعا سايكەس، استانانىڭ بارلىق بازارلارى قايتا قۇرىلادى، دەپ حابارلايدى ەلوردا ينفو بايقوڭىر اۋدانىنىڭ اكىمى ەرلان قاناليموۆكە سىلتەمە جاساپ.

بايقوڭىر اۋدانىنىڭ وزىندە 37 ءىرى ساۋدا ءۇيى مەن بازارلار بار.

«الاش تاسجولىنىڭ بويىنداعى كونتەينەرلەر، جايما بازارلاردىڭ ءبارى زاماناۋي كەيىپكە ەنەدى، ادامدار جابىق كەشەندە ساۋدا جاسايتىن بولادى. قازىر ورتالىق بازارداعى قايتا قۇرۋ جۇمىستارىن باستادىق. ونداعى ەكىنشى جانە ءۇشىنشى پاۆيلوندار 2019-جىلدىڭ سوڭىنا دەيىن ەلدىڭ يگىلىگىنە بەرىلەدى. كەزەكتە «شارىن» بازارى تۇر. «شاڭحاي» دەگەن اتپەن تانىلعان «كوكبازاردى» قايتا قۇرۋ بويىنشا كەيبىر ماسەلەلەر بار. جالپى، كوپتەگەن وزگەرىستەر بولادى»، - دەدى قاناليموۆ.

ساۋدا بازارلارىن جاڭعىرتۋ جانە كەڭەيتۋ جۇمىستارىن 2021-جىلعا قاراي اياقتاۋ جوسپارلانىپ وتىر. استانا تۇرعىندارى ازىق-تۇلىك الۋ ءۇشىن قالانىڭ و شەتىنەن بۇ شەتىنە بارماۋى ءۇشىن ساۋدا ورىندارىنىڭ قولجەتىمدىلىگى ماسەلەسىن شەشۋ بويىنشا ەلوردا اكىمدىگى تالداۋ جۇرگىزدى.

«كەمى بەس جاڭا بازار سالۋ جوبالارىن قاراستىرىپ جاتىرمىز. سونىڭ بىرنەشەۋىنىڭ - بەيسەكوۆ كوشەسىندەگى، تەمىرجول ۆوكزالىنىڭ ماڭىنداعى جاڭا بازارلاردىڭ قۇرىلىسى بيىل باستالادى»، - دەگەن بولاتىن اسەت يسەكەشەۆ اقپان ايىنداعى ەسەپ بەرۋ كەزدەسۋىندە.

سونىمەن قاتار استانا اكىمى ساۋدا الاڭدارىنىڭ يەلەرىنە، ەگەر ولار بازارداعى قاۋىپسىزدىك تالاپتارىنا جاۋاپ بەرمەسە، جابىلاتىنىن ەسكەرتكەن.