كينو ۇستىندە كوز جۇمعاندار

  استانا. قازاقپارات - كينو ءتۇسىرۋ دە، كينوعا ءتۇسۋ دە قيىن شارۋا. وعان الدىن الا ازىرلىك، اكتەرلەردىڭ دايارلىعى قاجەت، بارىنەن قىمباتى - فيلم ءتۇسىرىلىپ بولعانشا بارلىق اكتەرلەردىڭ ءتىرى جۇرگەنى.

وكىنىشكە قاراي، ءومىر مەن ءولىم ارپالىسقان زاماندا قانشا ساقتانساڭ دا زۇم اجالدىڭ كەزدەيسوق ەسىك قاعاتىن ءساتى بولادى. اسىرەسە، كينوعا ءتۇسىپ جاتقان ارتيستەردىڭ اجال قۇشۋى كوركەم دۇنيەلەردىڭ كۇل- تالقانىن شىعارادى.

بۇگىن كينو الاڭىندا توسىننان كوز جۇمعان 10 اكتەر تۋرالى ايتپاقپىز.

حيت لەدجەر - «قيىلداعى دوكتور پارناس»

 بۇل -  حيت لەدجەردىڭ سوڭعى فيلمى. ول اۋرۋدى باساتىن ءدارىنى كوپ ىشكەندىكتەن كينو ءتۇسىرىلىم بارىسىندا كوز جۇمعان. وسىعان بايلانىستى ءتۇسىرىلىم ۋاقىتشا توقتاتىلىپ، سەناري جازۋشىلار سيۋجەتكە ءبىرقاتار وزگەرىستەر ەنگىزەدى. ولار كەيىپكەردىڭ بەينەسىن قايتا- قايتا وزگەرتۋ ارقىلى اكتەردىڭ ولگەندىگىن بىلدىرگىسى كەلمەيدى. اقىرى دجونني دەپپ، كولين فاررەلل جانە دجۋد لوۋ سوڭعى ساتكە دەيىن باستى ءرولدى ءساتتى ويناپ شىعادى. ارتيستەر كينودان العان قاراجاتتارىن لەدجەردىڭ ەكى جاسار قىزى ماتيلداعا تاپسىرادى. ال حيتتىڭ فاناتتارى كارتينادا ايتىلاتىن اكتەردىڭ «الەم تاريحقا تولى -  كومەديا، مەلودراما جانە كەزدەيسوق كەلەتىن ءولىم تاريحى» دەگەن ءسوزىن جۇرەكتەرىنە جاتتاپ العان.

فيليپ سەيمۋر حوففمان - «اشقاراقتار ويىنى: سويكا- سايقىمازاق»

 ول ءفيلمنىڭ سوڭعى تۇسىرىلىمدەرى اياقتالۋعا ءبىر اپتا قالعاندا كوكناردى شامادان تىس پايدالانۋ سالدارىنان كوز جۇمدى. ونىڭ پەرسوناجى سيۋجەتتە نەگىزگى كەيىپكەر بولاتىن. سوندىقتان Lionsgate ستۋدياسى ونى ولتىرمەۋدى ءجون كورەدى. اقىرى پلۋتارح حەۆەنسبي سيفرلىق تەحنولوگيانى پايدالانۋ ارقىلى ءتۇسىرىلىمدى اياقتاپ شىعادى.

پول ۋوكەر - «فورساج 7»

 پول ۋوكەر كاليفورنيانىڭ سانتا- كلاريتا قالاسىندا جول اپاتىنان كوز جۇمدى. ول وسىندا قايىرىمدىلىق شارالارىنا قاتىسۋ ءۇشىن كەلگەندى. كريمينالدى كينونىڭ جەتىنشى ءتۇسىرىلىمىنىڭ جارتىسىنا عانا ءتۇسىپ ۇلگەرگەن 40 جاستاعى اكتەردىڭ ورنىن جوقتاتپاۋدىڭ بارلىق امالدارى قاراستىرىلادى. سەناريستەر ارادا 4 اي وتكەندە كەيىپكەردى زەينەتكەرلىككە شىعۋدى ويلاستىرىپ، پولدىڭ باۋىرلارى كالەب پەن كودي سوڭعى ساتتەردى ويداعىداي ورىنداپ شىعادى.

مەريلين مونرو - «بىردەڭە بولۋى مۇمكىن»

 بۇل فيلم -  مەريلين مونرو قاتىسقان سوڭعى تۋىندى. العاشىندا ول اۋىرىپ، ءتۇسىرىلىم الاڭىندا داۋ- داماي دا تۋىندايدى. ءتىپتى ونى كينوعا تۇسىرمەۋ ماسەلەسى دە كوتەرىلەدى. الايدا مونرومەن كەلىسىمشارت قايتا جاسالىپ، تامىز ايىندا ءتۇسىرىلىم باستالماقشى بولادى. دەگەنمەن مونرو ۇيىندە تەلەفون تۇتقاسىن ۇستاعان كۇيىندە ءولى تابىلادى.

 قايعىلى وقيعادان سوڭ كينو قايتا ءتۇسىرىلىپ، فيلم «مەن ورالدىم، قىمباتتىم» دەپ وزگەرتىلەدى. ايتسە دە، ايگىلى اكتەر قاتىسقان كەيبىر تۇستار كينودا پايدالانىلادى. Prometheus Entertainment كومپانياسى ءفيلمدى مەريلين مونرونىڭ 75 جىلدىعىنا وراي 2001 -جىلى 1 -ماۋسىمدا جۇرتشىلىققا كورسەتتى.

 كەرري فيشەر -  «جۇلدىزدى سوعىس: كۇشتەردىڭ جاندانۋى»

كەرري فيشەر 2016 -جىلى جەلتوقسان ايىندا كوز جۇمدى. ول سەگىزىنشى ەپيزودقا دا ءتۇسىپ ۇلگەردى.

 Lucasfilm كينوستۋدياسىنىڭ پرەزيدەنتى كەتلين كەننەدي ول تۋرالى وتە جاقسى پىكىر ءبىلدىردى. تۋىستارىنىڭ كەلىسىمىمەن كينولارداعى بەينەلەرىن پايدالانۋ ارقىلى فيلم سوڭىنا دەيىن تۇسىرىلەدى. وسىعان بايلانىستى ستسەنارييگە وزگەرىستەر ەنگىزىلگەن.

كىشى سەرگەي بودروۆ - «بايلانىسشى»

ول 15 جىل بۇرىن ءفيلمدى ءتۇسىرۋ بارىسىندا كوز جۇمدى. كارمادون شاتقالىنداعى كوشكىن سالدارىنان 125 ادام ولگەنىن جۇرت جاقسى بىلەدى. ولاردىڭ قاتارىندا بودروۆتىڭ 42 ارىپتەسى دە بولدى. بارلىعى جوعالعاندار تىزىمىندە.

 كينونى ءتۇسىرۋ تامىزعا بەلگىلەنگەندى. ءبىراق ول نارەستەلى بولۋىنا بايلانىستى بارلىق شارۋانى قىركۇيەككە قالدىرادى. قايعىلى كۇنى ءتۇسىرىلىم دە 3 ساعاتكە كەشىكتىرىلگەن. ەرتەرەك قامدانعاندا مۇمكىن ءبارى ءتىرى قالار ما ەدى...

دجەيمس دين - «الىپ»

قاۋىپسىز كولىك جۇرگىزۋ تاسىلىنە بايلانىستى الەۋمەتتىك جارنامالارعا تۇسكەن دجەيمس دين جول اپاتىنان قايتىس بولدى.

 دجەيمس دين ولەر الدىندا «الىپ» فيلمىنە تۇسەدى. 24 جاستاعى اكتەر ءبىر كارتينانى ءتۇسىرۋ عانا قالعاندا سپورتتىق Porsche 550 Spyder كولىگىمەن جولدا Ford Custom Tudor عا بەتپە- بەت سوقتىعىسادى. مارقۇم وسى فيلمگە تۇسكەنى ءۇشىن «وسكار» سىيلىعىن العان.

 ول الەۋمەتتى جارنامادا كولىك جارىسى تۋرالى سۇراعاندارعا: «بايقاپ جۇرىڭىزدەر، ويتكەنى سىزدەر قۇتقاراتىن ادامنىڭ ءبىرى مەن بولۋىم مۇمكىن» دەيدى. ال ارادا بىرنەشە اپتا وتكەندە كولىك ۇستىندە كوز جۇمدى.

ريۆەر فەنيكس - «لاس قان»

امەريكادا 90-جىلدارى جاس جۇلدىزدار كوشىن باستاعان ريۆەر فەنيكس ناشاقورلىقتان قايتىس بولدى. ول كەزدە «لاس قان» فيلمىن ءتۇسىرۋدى اياقتاۋعا 11 كۇن قالعان ەدى.

 وسىنىڭ سالدارىنان جوبا 19 جىل ساقتاندىرۋ كومپانياسىنىڭ سەيفىندە جاتادى. اقىرى ساقتاۋ قويماسىنا قارجى تولەمەس ءۇشىن كينونى جويىپ جىبەرۋگە ۇيعارىم جاسالادى.

 وسىنى ەستىگەن كارتينا رەجيسسەرى دجوردج سلەيزەر «قايعىلى كۇنگە» ەكى تاۋلىك قالعاندا قۇلىپ اشاتىن شەبەرلەر جالداپ، ءتۇن ىشىندە سەيفتەن 700 ك گ پلەنكانى گوللاندياعا الىپ كەتەدى. سول جاقتا Eyeworks ستۋدياسىنىڭ كومەگىمەن سلەيزەر فيلمدى قالپىنا كەلتىرىپ، 2012 -جىلى جۇرت نازارىنا ۇسىندى.

بريۋس لي - «ولىممەن ويناۋ»

ول باس اۋرۋىن باساتىن دارىدەن ولگەن. ويتكەنى بريۋس ليدىڭ دارىگە اللەرگياسى بار ەدى.

32 جاستاعى اكتەر «ولىممەن ويناۋ» فيلمىنە ءتۇسىپ جۇرگەن. كارتينانىڭ باسىم بولىگى دۋبلەردىڭ كومەگىمەن ءتۇسىرىلىپ، فيلم تەك 5 جىلدان سوڭ كورەرمەندەر نازارىنا ۇسىنىلعان.

برەندون لي - «قۇزعىن»

 كينو ءتۇسىرىلىمىنىڭ سوڭعى ساتتەرى ءجۇرىپ جاتقاندا، ول ىشىنەن وق جاراقاتىن الادى. وندا كەيىپكەرلەردىڭ ءبىرى برەندون ليدى اتۋ كەرەك بولعان. وكىنىشكە قاراي، كينو تۇسىرۋشىلەر تاپانشادا وق بارىن بايقاماعان. اكتەر كوپ قان جوعالتىپ، اقىرى 12 ساعاتتان سوڭ كوز جۇمادى.

روبين ۋيليامس - «ميسسيس داۋتفاير 2»

روبين ۋيليامستى ولەرىنەن 4 اي بۇرىن گازەت- جۋرنالدار اكتەردىڭ «ميسسيس داۋتفاير» فيلمىنە تۇسۋگە كەلىسىم بەرگەندىگىن جارىسا جازدى.

اجال ايتىپ كەلمەيدى. اكتەر قايتىس بولعان سوڭ فيلمنىڭ جالعاسى تۇسىرىلمەدى.

 

جولداسبەك دۋاناباي

«ايقىن»