ەلىمىزدەگى جالعىز قازاق ءتىلدى سپورت باسىلىمى جابىلىپ قالۋى مۇمكىن - دەپۋتات
مينيسترگە دەپۋتاتتىق ساۋال جولداعان ماجىلىسمەن قازىرگى «قازاق سپورتى» (بۇرىنعى «سپورت» گازەتى) مەن «سپورت» گازەتى ەكى تىلدە بولەك شىعاتىن قازاقستانداعى تۇڭعىش سپورت باسىلىمدارى ەكەنىن اتاپ ءوتتى.
«تاريحى 1959 -جىلدىڭ 1 -قاڭتارىنان باستالاتىن بۇل باسىلىمدارعا 2019 -جىلى الپىس جىل تولادى. كەزىندە قازاق سپورتىنىڭ كوش باسىندا تۇرعان نۇرمۇحانوۆ، ايحانوۆ، سەگىزبايەۆ، قوناقبايەۆ، ۇشكەمپىروۆ سەكىلدى جانە بۇگىن دە قازاقستاننىڭ الەمگە تانىتىپ وتىرعان مىڭداعان ساڭلاقتارىمىزدىڭ جەڭىسىن سۇيىنشىلەي حابارلاعان وسى - قوس باسىلىم»، - دەدى دەپۋتات.
ونىڭ ايتۋىنشا، 2014 -جىلى گازەتتىڭ اقپاراتتىق-ساراپتامالىق ەكسپەديتسياسى «نۇر وتان» پارتياسىمەن بىرلەسە وتىرىپ، بۇكىل رەسپۋبليكا اۋماعىنا ءىسساپارعا شىعىپ، «دەنى ساۋدىڭ - جانى ساۋ» اتتى دوڭگەلەك ۇستەل وتكىزگەن. 2020 -جىلعا دەيىن ەل حالقىنىڭ 30 پايىزىن سپورتقا تارتۋ تۋرالى پرەزيدەنت تاپسىرماسىنا وراي وبلىس اكىمدەرى اراسىندا «سپورتقا قالايسىڭ اكىم» اتتى بايقاۋ، «سپورتقا قامقورشى اكىم»، «سپورتشى اكىم» اتالىمى بويىنشا رەيتينگ ازىرلەگەن.
«ال قازاق تىلىندە «قازاق سپورتىنان» باسقا باسىلىم اتاۋلى جوق. ورىس ءتىلدى باسىلىمدار ونسىز دا كوپ. رەسەيدەن كەلەتىن «سوۆەتسكي سپورت»، «سپورت ەكسپرەسس» سەكىلدى كوپتەگەن باسىلىمدار جەتىپ ارتىلادى. سول سياقتى «پرو سپورت» تا سولاردىڭ ءبىر كوشىرمەسى. ال «قازاق سپورتى» رەسپۋبليكادا قازاق سپورتىنىڭ كۇيىن كۇيتتەپ جۇرگەن بىردەن- ءبىر باسىلىم»، - دەدى جامبىل احمەتبەكوۆ.
بارلىق مەرزىمدى بۇقارالىق اقپارات قۇرالدارى جەكە قولدارعا وتكەن كەزدە رەسپۋبليكالىق سپورت ۆەدومستۆوسىنىڭ قول استىندا بولىپ كەلگەن بۇل باسىلىمدارعا «الاتاۋ باسپا» پوليگرافيا كورپوراتسياسى قۇرىلتايشى اتانعان.
«بۇگىنگى كۇنگە دەيىن قال-قادىرىنشە قارجىلاندىرىلىپ كەلەدى. ءبىراق قازاقشا جانە ورىسشا ەكى گازەتتى قوسقاندا 8 بەتتەن، 16 بەتتىك اپتاسىنا ءبىر رەت توقتاۋسىز شىعارىپ تۇرۋ وڭاي ەمەس. وتە كوپ قاراجاتتى قاجەت ەتەدى. ەگەر قازاق سپورتىنىڭ الپىس جىلدىق تاريحى بار باسىلىمىنىڭ جابىلىپ قالۋ قاۋپى ءتونىپ تۇرعاندىقتان، سىزدەن كومەك كۇتىپ، قولداۋىڭىزدى سۇرايمىز»، - دەدى ابايەۆقا ارناعان ساۋالىن اياقتاعان دەپۋتات.
