بوكستىڭ وليمپيادا ويىندارىنان شىعارىلۋى مۇمكىن ەمەس

 استانا. قازاقپارات - حالىقارالىق بوكس قاۋىمداستىعى (AIBA) وكىلدەرى بوكستىڭ وليمپيادالىق سپورت ءتۇرى مارتەبەسىنەن ايىرىلۋى مۇمكىندىگىنە قاتىستى پىكىر ءبىلدىردى، دەپ حابارلايدى «قازاقپارات» ح ا ا ءتىلشىسى.

«ونداي جاعداي بولمايدى دەپ ۇمىتتەنەمىز. ونى كوز الدىمىزعا دا ەلەستەتە المايمىز، سەبەبى، ءبىز بوكستى جاقسى كورەمىز جانە بۇل سپورت ءبىزدىڭ ءومىرىمىزدىڭ اجىراماس بولىگى. بوكستى وسى مارتەبەسىنەن ايىرۋعا قانشا ادامنىڭ قۇزىرەتى جەتەتىندىگىنە قاتىستى ەشقانداي اقپاراتىمىز جوق»، - دەدى AIBA- نىڭ جاڭا اتقارۋشى ديرەكتورى توم ۆيردجەتس ۇيىمنىڭ سايتىندا جاريالانعان سۇحباتتا.

 سونداي- اق، ول ۇيىمنىڭ حالىقارالىق وليمپيادا كوميتەتى قويعان تالاپتاردىڭ بارلىعىن ورىندايتىنىن ايتتى.

«بۇل جاعدايعا بايىپپەن قارايمىز. ح و ك تاراپىنان قويىلعان تالاپتاردىڭ ءبارىن ورىنداۋعا بارلىق كۇش- جىگەرىمىزدى سالامىز. كوميتەتتەگىلەر ءبىزدىڭ وزگەرۋگە جانە ۇلگىلى وليمپيادالىق فەدەراتسيا بولۋعا دەگەن تالپىنىسىمىزدى كورەدى دەپ سەنەمىز»، - دەدى ول.

 ت. ۆيردجەتستى AIBA- نىڭ ۋاقىتشا پرەزيدەنتى گافۋر راحيموۆ قولدادى.

 «مەن AIBA- نىڭ جاڭا اتقارۋشى ديرەكتورى توم ۆيردجەتسپەن بىرگە AIBA- دا جاسالعان جانە قازىرگى ۋاقىتتا جۇزەگە اسىرىلىپ جاتقان باسقارۋ مەن جەتەكشىلىك سالالارىنداعى رەفورمالارعا تولىقتاي قوسىلامىن»، - دەدى ول.

 سونداي- اق، ول AIBA- دا ۇيىم قىزمەتىنىڭ اشىقتىعىن ارتتىرۋ ءۇشىن بارىنشا كۇش سالىنىپ جاتقاندىعىن جەتكىزدى.

 «ۇيىم وليمپيادا وتباسىنىڭ لايىقتى مۇشەسى بولىپ قالا بەرۋى ءۇشىن ءبىز ونىڭ اشىقتىعىن ارتتىرۋ تۇرعىسىندا ىلگەرى جىلجىپ كەلەمىز، AIBA- نى باسقارۋ، قارجى سالالارىندا جانە دە بوكستاعى ارتۇرلىلىك، تورەلىك ەتۋ سەكىلدى ماسەلەلەردىڭ ءبارى مەنىڭ AIBA- نىڭ اتقارۋشى كوميتەتى، ح و ك جانە AIBA- نى جاڭارتۋ بويىنشا ۇلتتىق فەدەراتسيالارعا بەرگەن ۋادەمە ساي ىسكە اسىرىلىپ جاتىر»، - دەدى راحيموۆ.

 ەستەرىڭىزگە سالا كەتەيىك، حالىقارالىق وليمپيادا كوميتەتىنىڭ باسشىسى توماس باح اعىمداعى جىلدىڭ اقپان ايىندا AIBA- عا قاتىستى تەرگەۋ جۇمىستارىنىڭ باستالعانىن مالىمدەگەن ەدى.

ح و ك- تە وليمپيادا ويىندارىنداعى تورەلىك ەتۋگە قاتىستى الاڭداۋشىلىق بىلدىرگەن بولاتىن. ح و ك- كە ناتيجەسى كۇدىك كەلتىرگەن جەكپە- جەكتەردىڭ ءبىرى ريو وليمپياداسىنىڭ فينالىندا قازاقستاندىق ۆاسيلي ليەۆيت پەن رەسەيلىك ەۆگەني تيشەنكو اراسىندا وتكەن كەزدەسۋ بولدى. سول كەزدە كورەرمەندەردىڭ جاپپاي نارازىلىعىنا قاراماستان، تورەشىلەر جەڭىستى ر ف وكىلىنە بەرگەن ەدى.