استانادا سينگاپۋر مەكتەبى سالىنادى
«استانا» الەۋمەتتىك- كاسىپكەرلىك كورپوراتسياسىنىڭ باسقارما ءتوراعاسى نۇرلان جاقىپوۆتىڭ ايتۋىنشا، مەكتەپ سينگاپۋر مودەلى بويىنشا 1500 وقۋشىعا ارنالىپ سالىنباق. مەكتەپ ءۇش بولىكتەن تۇرادى. ءبىرى باستاۋىش مەكتەپ، تاعى ءبىرى ورتا مەكتەپ بولسا، ءۇشىنشى بولىگى ءبىتىرۋشى سىنىپتارعا ارنالادى. بالالار مەكتەپ اۋماعىنداعى كامپۋستا تۇرادى دەپ جوسپارلانۋدا.
ونىڭ ايتۋىنشا، مەكتەپ سوڭعى ۇلگىدەگى تەحنيكالارمەن جابدىقتالادى. سونداي- اق، وقۋشىلاردى شەتەلدىك ۇستازدار وقىتاتىن بولادى. ازىرگە سينگاپۋر مەكتەبى جوباسىنىڭ قۇنى مەن ينۆەستورى تۋرالى اقپارات جاريا ەتىلگەن جوق.
«اتالعان جوبا ءا ءا ك ستراتەگياسىنا ساي. ول، ءبىر جاعىنان، الەۋمەتتىك جوبا بولىپ تابىلادى، ەكىنشى جاعىنان ءبىلىم بەرۋ سالاسىنا ۇزدىك حالىقارالىق تاجىريبەنى تارتۋعا، قالاداعى ءبىلىم بەرۋ دەڭگەيىن ارتتىرۋعا مۇمكىندىك بەرەدى»، - دەدى نۇرلان جاقىپوۆ.
