بەكبولات تىلەۋحان ازاماتتىق الا الماي جۇرگەن قانداستارىمىزدىڭ جاعدايىن ايتتى
«جاسىراتىنى جوق قىتايدان، وزبەكستاننان، الىس-جاقىن شەتەلدەن قازاقستانعا ازاماتتىق الامىز دەپ تاريحي وتانىنا كەلىپ، بوسىپ جۇرگەن حالىقتىڭ سانى كوپ. وسىندا قۇجاتىن رەتتەي الماي ساندالىپ جۇرگەن ازاماتتاردى ەلىمىزدە زاڭسىز ءجۇرسىڭ دەپ ايىپتاپ، سوتتىڭ شەشىمىمەن شىعارىپ جاتقانىمىز دا وتىرىك ەمەس. ءبىزدىڭ اتىمىزعا بالا-شاعاسى، وتباسى مۇشەلەرى جان-جاققا شاشىلىپ كەتكەن ازاماتتاردان ارىز-شاعىمدار كوپتەپ تۇسۋدە. قانداي دا ءبىر ۇكىمەتتىك جەڭىلدىكتەرمەن قۇجاتىن رەتتەپ بەرۋدى سۇراپ وتىرعان ەل كوپ-اق»، - دەدى دەپۋتات.
ماسەلەن، ونىڭ ايتۋىنشا، قاراقالپاقستاننان ەرەيمەنتاۋعا 2007 -جىلى كوشىپ كەلگەننەن بەرى بۇگىنگى كۇنگە دەيىن ۇكىمەتتەن بەرىلەتىن كۆوتاسىن دا، قۇجاتىن دا رەتتەي الماي جۇرگەن ادامدار ءالى دە مول.
«جاسىراتىنى جوق، كوبىنەسە كەلەتىن ادامداردىڭ بارلىعى بىردەي اسا ساۋاتتى ەمەس. ديقاندار، مالشىلار كەلەدى. مىسال ءۇشىن قىتايدان كەلگەن 24 جاستاعى جىگىت تاريحي وتانىنىڭ ازاماتى بولامىن دەگەن نيەتپەن الماتى وبلىسىنا قۇجات تاپسىردى. ىقتيار حاتىن كۇتىپ جۇرگەندە ءۇش اي تولماي ەلدە زاڭسىز ءجۇرسىڭ دەپ ايىپتاپ، ۇستاپ، ەلىنە قايتسىن دەگەن سوتتىڭ شەشىمى شىقتى. ەندى اعايىن، سىبىرلاعاندى قۇداي ەستىمەي مە. قىتاي بيلىگىنىڭ بۇگىنگى ساياساتى قازاققا اسا قولايلى بولىپ وتىرعان جوق. ول جەردە ءارى-ءسارى كۇيگە، تاعدىردىڭ تالقىسىنا ءتۇسىپ قالعان قانداستارىمىز قانشاما. ونداي نارسەنى جۇرەگىمىزدىڭ تۇپكىرىمەن جەتە تۇسىنبەسەك تە بولمايدى. جالپى كومەكتەسۋدەن گورى كەدەرگى جاساۋ وپ-وڭاي»، - دەدى بەكبولات تىلەۋحان.
ونىڭ اتاپ وتۋىنشە، ءبولىنىپ-جارىلعان وتباسىلاردىڭ قايتا قوسىلۋىنا ىقپال جاساۋعا نەگىز بولاتىن حالىقارالىق راتيفيكاتسيالار، كوميسسيالار، حەلسينكي، ۆەنا، جەنەۆا كونۆەنسيالارى بار.
«سوعان سۇيەنە وتىرىپ ءبىر قايران جاساۋعا بولماي ما؟ قانداستارىمىز بوسىپ كەتتى عوي، شىن مانىندە قينالىپ جاتىر»، - دەدى ول.
