تەرروريزم ءۇشىن سوتتالعانداردىڭ قازاقستاندا قالۋى قوعامعا قاۋىپتى - دەپۋتات
بۇل تۋرالى بۇگىن ماجىلىستەگى ۇكىمەت ساعاتىندا دەپۋتات نۇرلان ءابدىروۆ ايتتى، دەپ حابارلايدى قازاقپارات.
«الەمدە تەرروريستىك قاتەردىڭ وسۋىنە بايلانىستى قالىپتاسىپ وتىرعان كۇردەلى جاعدايدى ەسكەرە وتىرىپ، وتكەن جىلى «ازاماتتىقتان ايىرۋ» ينستيتۋتى ەنگىزىلدى. بۇل سۇراق كونستيتۋتسيادا ناقتىلانعان. دەگەنمەن، تەرروريستىك قىلمىسى ءۇشىن سوتتالىپ، قازاقستاننىڭ ازاماتتىعىنان ايىرىلعان ادامداردىڭ ماسەلەسى سوڭىنا دەيىن شەشىلمەي وتىر. ولار جازاسىن وتەگەننەن كەيىن قازاقستاندا قالا الادى. سول سەبەپتى قوعامعا ودان ءارى قاۋىپ توندىرە بەرەدى»، - دەدى نۇرلان ءابدىروۆ.
دەپۋتاتتىڭ پايىمىنشا، بۇگىنگى كۇنى مەملەكەت كوشى-قون سالاسىندا شەتەلدىك قوناقتارعا جىلى شىراي تانىتىپ، ولارعا ىزەت پەن قۇرمەت كورسەتۋ جونىندە شارالار قابىلداپ جاتىر. ال ىشكى كوشى-قون، ادامداردىڭ يگىلىگى جانە ەلدى دامىتۋعا باعىتتالعان.
«بۇل جەردە دۇرىس قۇرىلعان جانە ءتيىمدى جۇمىس ىستەيتىن كوشى-قون باقىلاۋى وڭ اسەرىن تىگىزۋگە ءتيىستى. ىشكى ىستەر مينيسترلىگى وسى جاعدايدى جەتە تۇسىنەدى جانە بۇل ساياساتتى مۇلتىكسىز ورىندايدى دەپ ۇمىتتەنەمىز»، - دەدى ول.
ايتا كەتەيىك، نۇرلان ءابدىروۆ 2017 -جىلى قازاقستاندا قوسارلانعان ازاماتتىعى بار شامامەن 600 ادام جازاعا تارتىلعانىن ايتقان بولاتىن. مۇنان بولەك، دەپۋتات قازاقستاندا كوشى-قون باقىلاۋىنىڭ ءبىرتۇتاس اقپاراتتىق بازاسىن جاساۋ قاجەتتىگىنە نازار اۋدارتتى.