قازاقستانعا كەلگەن شەتەلدىكتەردىڭ تەڭ جارتىسى ۋاقىتشا تىركەۋگە تۇرمايدى
«2015-جىلدان باستاپ ەلىمىزگە كەلەتىن شەتەلدىكتەردىڭ سانى جىل سايىن 20 پايىزعا ارتىپ وتىر. تەك وتكەن جىلى عانا بىزگە 5,5 ميلليون شەتەلدىك، نەگىزىنەن ت م د ەلدەرىنىڭ ازاماتتارى كەلدى. بۇل رەتتە ىشكى ىستەر ورگاندارىندا نە ءبارى 2,5 ميلليون ادام عانا تىركەلگەن، ياعني جارتىسىنان دا از»، - دەدى دەپۋتات.
ونىڭ ايتۋىنشا، ميگرانتتار تاراپىنان ورىن الاتىن قۇقىق بۇزۋشىلىق دەڭگەيىن ەسكەرەر بولساق، بۇل وزەكتى ماسەلە. ويتكەنى، ىشكى ىستەر مينيسترلىگىنىڭ دەرەكتەرىنە سايكەس، سوڭعى 3 جىلدا 330 مىڭ شەتەلدىك اكىمشىلىك جاۋاپكەرشىلىككە تارتىلىپ، كوشى- قون زاڭىن بۇزعانى ءۇشىن 36 مىڭنان استام ادام ەل اۋماعىنان شىعارىلعان.
«شەتەلدىكتەرگە قاتىستى 3506 قىلمىستىق ءىس قوزعالعان. بۇعان قوسا، قىلمىستاردىڭ باسىم بولىگى ۇرلىق جانە ەسىرتكى قىلمىسىنا قاتىستى. 2,5 مىڭنان استام شەتەلدىكتىڭ ءوزى قىلمىستىڭ قۇربانىنا اينالدى. كوشى-قون قىزمەتى تاراپىنان باقىلاۋدىڭ جەتكىلىكسىزدىگى پروبلەماسى انىق كورىنىپ تۇر»، - دەدى نۇرلان ءابدىروۆ.
دەپۋتاتتىڭ سوزىنە قاراعاندا، زاڭسىز كوشى-قونعا قارسى تۇرۋداعى مەملەكەتتىك ورگاندار قىزمەتىنىڭ تيىمدىلىگىن ارتتىرۋ كەرەك.
«وزگە دە ماڭىزدى شارالاردىڭ قاتارىندا ىشكى ىستەر مينيسترلىگى ۇلتتىق قاۋىپسىزدىك كوميتەتىنىڭ شەكارا قىزمەتىمەن بىرگە وتكىزۋ بەكەتتەرىندە بيومەتريالىق باقىلاۋ جۇيەسىن ەنگىزۋى، تۇلعانى تەڭدەستىرۋگە مۇمكىندىك بەرەتىن ءتول قۇجات- ۆيزا جانە وزگە دە قۇجاتتاردىڭ قورعالۋىن ارتتىرۋ ەسەبىنەن زاڭسىز كوشى-قون ارنالارىنىڭ ۇيىمداستىرىلۋىنا قارسى تۇرۋى، ەلدىڭ حالىقارالىق مىندەتتەمەلەرىن ەسكەرە وتىرىپ، زاڭسىز ميگرانتتاردى دەپورتاتسيالاۋدىڭ ءتيىمدى تەتىكتەرىن ازىرلەۋى قاجەت»، - دەدى ول.
ايتا كەتەيىك، نۇرلان ءابدىروۆ 2017-جىلى قازاقستاندا قوسارلانعان ازاماتتىعى بار شامامەن 600 ادام جازاعا تارتىلعانىن ايتقان بولاتىن.
