قازاقستانعا كوبىنەسە قاي ەلدىڭ ازاماتتارى كەلەتىنى بەلگىلى بولدى
«ەلىمىزدەگى كوشى-قون پروتسەسى وتە اۋقىمدى، بولاشاقتا ول تەك ارتا تۇسەدى. رەسمي ستاتيستيكا بويىنشا سوڭعى ءۇش جىلدا ءبىزدىڭ ەلىمىزگە 5,6 ميلليون استام شەتەلدىك ازامات كەلگەن. ولاردىڭ 90 پايىزدان استامى ت م د ەلدەرىنەن، ياعني نەگىزىنەن رەسەيدەن، وزبەكستاننان، قىرعىزستاننان كەلگەندەر. سونىمەن قاتار الىس شەتەلدەن ەلىمىزگە ساپارلايتىن ميگرانتتاردىڭ قاتارى كوبەيگەنى بايقالۋدا. وسى ۋاقىتتا ولاردىڭ سانى 620 مىڭ ادامعا جەتتى. بۇل شەتەلدىكتەردىڭ كوبى قىتاي مەن تۇركيا ازاماتتارى»، - دەدى مينيستر.
اتقارىلىپ جاتقان جۇمىستاردىڭ باستى مىندەتتەرى زاڭسىز كوشى-قونمەن كۇرەسۋگە نەگىزدەلگەنىنە توقتالعان قاسىموۆ، سەبەبى بۇل شارالار ەلىمىزدەگى قوعامدىق ءتارتىپ ءۇشىن ماڭىزدى ەكەنىن جەتكىزدى.
«ويتكەنى كوشى-قون اعىمى ەسىرتكى بيزنەسىمەن، ادام ساۋداسىمەن، ەكسترميزم جانە لاڭكەستىكپەن بايلانىستى بولعان كەزدەرى از ەمەس. بۇل سالادا باقىلاۋ مەن رەتتەۋدى ءتيىمدى ۇيىمداستىرماساق، ەلىمىزدىڭ الەۋمەتتىك-ەكونوميكالىق دامۋىنا زيان كەلۋى مۇمكىن»، - دەدى قالمۇحانبەت قاسىموۆ.
