گرۋزيا عاشىقتار كۇنىن قازاقستاندىقتارمەن بىرگە تويلايدى
ءدال وسى ۋاقىتتا گرۋزيالىقتار دا عاشىقتار كۇنىن تويلايدى ەكەن. بۇل ءداستۇر كاۆكاز ەلىندە 1994-جىلدان باستاپ قالىپتاسقان، دەپ جازادى حابار 24.
قاراعاندى تۋماسى جازۋشى ماريا شەگوليحينا 7 جىلدان بەرى تبيليسيدە تۇرادى. شىعارماشىلىق شابىتىنىڭ باستى كوزىنە اينالعان جارى ميحايل سەبۋا ەرتەگى كەيىپكەرى سەكىلدى سۇيىكتىسىن ءوز وتانىنا تاۋلى ولكەگە الىپ كەتكەن. كەلە-كەلە ماريانىڭ گرۋزياعا دەگەن سۇيىسپەنشىلىگى دە ارتتى. سول سەبەپتەن ەرلى-زايىپتىلار ءۇشىن 15- ءساۋىردىڭ ورنى بولەك.
«ءبىزدىڭ تانىسۋىمىز كەزدەيسوق جاعداي ەمەس، بۇل ماڭدايىمىزعا جازىلعان دەپ ويلايمىز. جاراتقاننىڭ ءوزى ونى قاراعاندىعا اكەلىپ، ال مەنى ول توقتاعان جەرگە ەرتىپ كەلگەن. ارينە، وعان عاشىق بولعانىمدى ءتۇسىندىم، ونىڭ ارقاسىندا گرۋزياعا بوي ۇيرەتتىم، سۇيىسپەنشىلىگىم كۇشەيدى. ول ماعان وسى ەلدى سىيعا تارتقان ىسپەتتى. وسىمەن ماحابباتىم ون ەكى جىل بويى جالعاسىپ كەلەدى»، - دەيدى جازۋشى ماريا شەگوليحينا
«بۇگىن، 15- ساۋىردە گرۋزيا عاشىقتار كۇنىن اتاپ ءوتىپ جاتىر. بۇل داتا قازاقستاندا دا عاشىقتار كۇنى ەكەنىن ءبىلىپ، تاڭعالدىق. وسى مەيرامدى مىندەتتى تۇردە تويلايمىز. قازاقستان مەن گرۋزياداعى بۇكىل عاشىقتاردى وسى مەرەكەمەن قۇتتىقتايمىن. بۇل - ەلدەرىمىزدى بىرىكتىرەتىن مەيرام»، - دەدى ميحايل سەبۋا.
گرۋزيادا عاشىقتار كۇنىن تويلاۋدى وسىدان 24 جىل بۇرىن جۋرناليست بەسيك چۋبينيدزە ۇسىنىپتى. وسىلايشا ول جان جارىنا ەرەكشە سىي جاساماق بولعان. ال ەل پارلامەنتى وسى باستاماسىن قولداپ، 15- ءساۋىردى عاشىقتار كۇنى رەتىندە بەكىتكەن.
«قازاقستاندا دا 2011-جىلدان بەرى عاشىقتار كۇنى اتالىپ جۇرگەنىن ەستىپ، ريزا بولدىم. ماحابباتتىڭ ءتىلى دە، ۇلتى دا جوق، ول عاشىقتار اراسىنداعى جوعارى سەزىم. گرۋزيا جەرىنەن بۇكىل قازاقستاندىقتاردى وسى مەرەكەمەن قۇتتىقتاپ، مول باقىت، زور دەنساۋلىق تىلەيمىن»، - دەدى جۋرناليست بەسيك چۋبينيدزە.
بۇل كۇنى، ارينە، گۇل مەن سىيلىق ساتاتىن دۇكەندەردىڭ ساۋداسى قىزىپ تۇر. تبيليسيدە عاشىقتار ءۇشىن ارنايى شارالار كونسەرتتەر، كينوكورسەتىلىمدەر مەن ساياحاتتار ۇيىمداستىرىلعان. العاشىندا بۇل مەرەكە باتىس ەۋروپالىق ۆالەنتين كۇنىنە بالاما رەتىندە ويلاستىرىلعان ەدى. الايدا گرۋزيندەر جاڭا مەيرامدى قۋانا قابىلداعانمەن، ەسكىسىن دە ءالى ەستەن شىعارا قويماعان.
