الماتىدا ۆەلوشەرۋدىڭ جاڭا ماۋسىمى اشىلدى
قالا قوناقتارى مەن تۇرعىندارى «نۇرلى تاۋ» بيزنەس ورتالىعىنان باستالىپ تۇڭعىش پرەزيدەنت ساياباعىنا دەيىن جالعاسقان 9 شاقىرىمدىق قاشىقتىقتى باعىندىردى. اۋەسقويلارمەن بىرگە بۇل ۆەلوشەرۋگە الماتى قالاسىنىڭ اكىمى باۋىرجان بايبەك، دەنە شىنىقتىرۋ جانە سپورت باسقارماسىنىڭ باسشىسى ءابىل دوڭبايەۆ قاتىستى.
«وسىنداي ءىس-شارالار قالا تۇرعىندارىنا ۋاقىتىن ءتيىمدى ءارى كوڭىلدى وتكىزۋگە جاقسى مۇمكىندىك. وسى ۋاقىتقا دەيىن ءبىز قوعامدىق كولىكتەردە، كوشەلەردە، ساياباقتاردا، كەز كەلگەن جاستاعى ادامدار تانىسىپ، دەمالىپ، جۇمىس جاسايتىنداي جاعداي جاساۋ جولىندا جۇمىس اتقارىپ كەلەمىز»، - دەيدى ءوز سوزىندە الماتى قالاسىنىڭ اكىمى.
سونىمەن قاتار، باۋىرجان بايبەك قازىرگى تاندا قالادا سالاۋاتتى ءومىر سالتى مەن سپورتقا جاقسى كوڭىل ءبولىنىپ جاتقانىن اتاپ ءوتتى. الماتىدا بۇگىنگى تاندا 68 شاقىرىمدىق ۆەلودالىزى سالىندى. سونىمەن قاتار، قالا باسشىسى ۆەلوسيپەدتەردى جالعا بەرەتىن «Almaty bike» جوباسى قارقىمدى دامىپ، قالانىڭ ورتالىق كوشەلەرىندە 1730 ۆەلوسيپەدكە ارنالعان 200 ۆەلوسيپەد تۇراقتارى جۇمىس ىستەپ تۇرعانىن تىلگە تيەك ەتتى. ونىن ايتۋىنشا جىلدا وتەتىن «الماتى تۋرى» ۆەلوجارىسى قالانىڭ تانىمال برەندىنە اينالىپ، الماتىنىڭ تۋريستىك جانە سپورتتىق قالا يميدجى رەتىندە شەتەلگە تانىمالدىعىن ارتتىرۋدا.
بۇگىنگى وتكەن ۆەلوشەرۋدىڭ مارەسىندە قاتىسۋشىلاردىڭ اراسىندا 20 ۆەلوسيپەد، سونىمەن قاتار وزگەدە باعالى سىيلىقتار ويناتىلدى. بارلىق كەلۋشىلەردىڭ الدىندا ءوز ونەرلەرىمەن Shamsi», Alimeتوپتارى شىعىپ، ءىس-شارا «Almaty Street Fitness» باعدارلاماسىمەن جالعاسىن تاپتى.
ايتا كەتۋ كەرەك، 2017-جىلى «سپورتتىق الماتى» باعدارلاماسى بويىنشا قالادا 21 ۆەلوشەرۋ ۇيىمداستىرىلىپ، 21 مىڭ ادام قاتىسقان بولاتىن.
